Холбооны Бүгд Найрамдах Герман Улсын Канцлер Фридрих Мерц Бээжинд хийж буй айлчлалынхаа үеэр хоёр талын түншлэл, яриа хэлэлцээг улам бэхжүүлэхийг уриаллаа. Энэхүү айлчлал нь дэлхийн хоёр дахь том эдийн засаг болох Хятад улстай хийж буй худалдаанд үүссэн томоохон алдагдлыг багасгах, хоёр улсын харилцааг шинэ шатанд гаргах зорилготой юм.

Канцлерын хувиар Хятадад хийж буй түүний анхны айлчлалыг бизнесийн томоохон төлөөлөгчид дагалдан иржээ. Тэрбээр БНХАУ-ын удардагч Ши Жиньпинтэй уулзах үеэрээ өнгөрсөн онд Хятад улс Германы худалдааны хамгийн том түнш байсныг дурдаад, хоёр улсын "иж бүрэн стратегийн түншлэл"-ийг гүнзгийрүүлэх хүсэлтэй байгаагаа илэрхийлсэн байна.

Ши Жиньпин Канцлерын хэлсэн үгийг таатай хүлээн авсан байна. Ф.Мерцийн хувьд Германы эдийн засагт улам бүр өгөөжгүй болоод байгаа хэдий ч тус улсын аж үйлдвэрийн гол ашиг сонирхлын цөм хэвээр буй эдийн засгийн харилцааг шинээр тодорхойлох амаргүй сорилттой тулгараад байгаа юм.

"Дэлхий ертөнц хэдий чинээ үймээн самуунтай, харилцан хамааралтай болно, төдий чинээ Хятад, Герман хоёр улс стратегийн харилцаа холбоогоо бэхжүүлж, харилцан итгэлцлээ гүнзгийрүүлэх хэрэгтэй" хэмээн Ши Жиньпин хэлжээ.

Францын Ерөнхийлөгч Эммануэл Макрон, Их Британийн Ерөнхий сайд Кир Стармер нарын айлчлалын дараа хийж буй Германы Канцлерын энэхүү айлчлал нь Трампын засаг захиргаатай санал зөрөлдөөн улам нэмэгдэж байгаатай холбоотойгоор Европын удирдагчид Бээжинтэй тогтоосон хэлхээ холбоогоо бэхжүүлэхийг эрмэлзэж буй үед тохиож байна.

Сүүлийн хоёр жил үргэлжилсэн эдийн засгийн уналтаас дөнгөж сэргэж буй Германы сул эдийн засгийн хувьд Хятадын хэрэглэгчдийн асар том зах зээл чухал ач холбогдолтой байгааг энэхүү айлчлал харууллаа. Нөгөө талаас Германы бизнес эрхлэгчдийн дунд стратегийн хамааралт байдлыг багасгах буюу "эрсдэлээс бууруулах" стратегитай холбоотой түгшүүр нэмэгдэж буй үед уг айлчлал болж байна.

Ирэх долоо хоногт Вашингтонд айлчлах Ф.Мерц Хятадын компаниудыг Германд хөрөнгө оруулалтаа нэмэгдүүлэхийг уриалсан боловч хоёр тал нөхцөл байдлыг бодитоор үнэлэх хэрэгтэйг онцолжээ.

Ф.Мерц мөн Хятадын Төрийн зөвлөлийн Ерөнхий сайд Ли Чянтай уулзсан байна. Ф.Мерцтэй уулзахдаа Ли Чян Хятад улс автомашин, химийн үйлдвэрлэлээс гадна хиймэл оюун, био анагаах зэрэг шинээр гарч ирж буй салбаруудад хамтран ажиллах хүсэлтэй байгаагаа илэрхийллээ.

Эх сурвалж: Reuters