Газрын тос дамжуулах “Дружба” хоолойг засварлахад хэдэн долоо хоногийн хугацаа шаардлагатай, надад ирсэн мэдээллээр, сар хагасын дараа дахин ашиглаж эхэлж магадгүй гэж Украины Ерөнхийлөгч В.Зеленский мэдэгдлээ.
Украины талын мэдэгдэж байгаагаар, Оросын нефтийг Унгар, Словак руу зөөвөрлөдөг уг хоолой нэгдүгээр сард Оросын цэргийн цохилтод өртөн эвдрэн сүйджээ. Унгар, Словакийн талууд “засварын ажлыг санаатайгаар сунжруулж байна” хэмээн Зеленскийг буруутгаж байгаа юм.
Уг хоолойгоор нефть дамжуулах боломжгүй болсноор шалтаглан Унгарын Ерөнхий сайд В.Орбан Европын Холбооноос Киевт олгох гэж буй 90 тэрбум еврогийн зээл ба Оросын эсрэг шинэ багц хоригийг бойкотлосоор байна. Энэ хоёр асуудлыг хоёрдугаар сарын сүүлчээр шийдвэрлэх ёстой байсан юм.
Эвдэрсэн хоолойг засварлан сэргээх ажлын явцтай танилцахын тулд Унгарын тал хянан шалгах тусгай төлөөлөгчдөө илгээхээр шийдвэрлэсэн бөгөөд төлөөлөгчдийг Эрчим хүчний дэд сайд ахлах ажээ.
Хэдийгээр “Дружба” хоолой ажиллахгүй байгаа боловч одоогоор Унгар, Словакийн хувьд нефтийн хангамж тасалдах аюул нүүрлээгүй байна. Европын Комиссын мэдээллээр, тус хоёр улс 3 сарын нөөцтэй байгаагаас гадна Хорватын нутгаар дайран өнгөрдөг Адриатын нефть дамжуулах хоолойгоор нийлүүлэлт хийх боломжтой. Гэхдээ энэ тохиолдолд Оросынхоос илүү үнэтэй нефть авахад хүрнэ.
Эх сурвалж: DW
