Японы Засгийн газар жуулчдын урсгал нэмэгдсэнтэй холбоотойгоор хилээр нэвтрэх журмыг хөнгөвчлөх үүднээс ихэнх гадаадын жуулчдыг биечлэн шалгах журмыг цуцлахаар төлөвлөж байна.
Ингэснээр 2028 оны санхүүгийн жилээс хэрэгжиж эхлэх JESTA буюу аяллын зөвшөөрлийн цахим системээр цуглуулсан мэдээлэлд үндэслэн жуулчдыг нэвтрүүлнэ гэж тус улсын цагаачлалын алба мэдээлжээ.
Нисэх онгоцны буудлуудын ачааллыг багасгахын тулд ийнхүү биечлэн шалгадгийг цуцалж байгаа нь олон улсын хэмжээнд тун ховор тохиолдол юм.
Японы Засгийн газар энэхүү системийг ашиглах эрх зүйн орчныг бүрдүүлэхийн тулд Цагаачлалын хяналтын тухай хуульд нэмэлт өөрчлөлт оруулахаар төлөвлөж байгаа бөгөөд хуулийн төслийг парламентын энэ удаагийн чуулганд өргөн барих ажээ.
Шинэ системд богино хугацааны визээс чөлөөлөгдсөн орнуудын жуулчид хамрагдах бөгөөд одоогоор 74 улс, бүс нутаг энэ шаардлагыг хангаж байгаа юм. Япон улс 2025 онд 42.7 сая жуулчин хүлээн авсан нь түүхэн дээд үзүүлэлт бөгөөд 2030 он гэхэд 60 саяд хүргэх зорилт тавьжээ.
JESTA системээр жуулчид аяллын зорилгоо цахимаар урьдчилан мэдүүлэх бөгөөд цагаачлалын алба нэвтрэх зөвшөөрөл олгох эсэхийг шийднэ. Хугацаа хэтрүүлэн оршин суух магадлалтай иргэдэд онгоцонд суух зөвшөөрөл олгохгүй аж.
Одоогоор зарим нисэх буудалд зорчигчдын хурууны хээ, зургийг авдаг төхөөрөмжийг ашиглаж эхлээд байна. Энэхүү төхөөрөмж нь цагаачлалын болон гаалийн шалгалтыг нэгэн зэрэг гүйцэтгэдгээрээ давуу талтай. Шинэ журам хэрэгжиж эхэлснээр ямар нэгэн зөрчил илрээгүй тохиолдолд шууд нэвтрэх боломж бүрдэх юм. Харин сэжигтэй тохиолдол илэрвэл хяналтын ажилтнууд биечлэн шалгах ажээ.
Эх сурвалж: Kyodo
Уг системийг одоогоор Нарита, Ханеда, Кансай, Фүкүока нисэх буудлуудад ашиглаж байгаа бөгөөд цаашид ашиглах буудлын тоог нэмэгдүүлэхээр төлөвлөж байна.
