Унгар улс эсэргүүцсээр байгаа хэдий ч Европын Холбооноос Украинд амласан 90 тэрбум еврогийн /104.2 тэрбум ам.доллар/ зээлийг олгох арга замыг олох болно гэж Европын Комиссын дарга Урсула фон дер Ляйен мэдэгджээ.
“Бид ямар ч байсан амлалтаа биелүүлнэ” гэж тэрбээр Брюссель хотноо болсон дээд хэмжээний уулзалтын дараа мэдэгджээ. Уг уулзалтаар ЕХ-ны удирдагчид Украинд олгох санхүүгийн тусламжид хориг тавиад байгаа Унгарын Ерөнхий сайд Виктор Орбаныг ятгаж, шийдвэрийг нь өөрчлүүлж чадаагүй байна.
Европын Зөвлөлийн дарга Антониу Кошта мэдэгдэхдээ, Европын Холбооны /ЕХ/ гишүүн орнууд Унгарын эсэргүүцлийг "байж боломгүй" үйлдэл гэж шүүмжилснийг дурдаад, “тохиролцсон л бол амлалтдаа заавал хүрэх ёстой. Европын Холбоог хэн ч сүрдүүлж чадахгүй” гэжээ.
Германы Канцлер Фридрих Мерц хэлэхдээ, ЕХ-ны удирдагчид зээлийг олгох боломжит хувилбаруудыг боловсруулахыг Европын Комисст үүрэг болгосон гэдгийг мэдэгджээ. Тэрбээр В.Орбаны тавьсан хоригийг урьд өмнө үзэгдээгүй “итгэл эвдсэн ноцтой үйлдэл” гэсэн байна.
“Иймэрхүү үйлдэл нь гишүүн орнуудын хоорондын харилцаанд хар толбо үлдээнэ. Энэ бол харилцан итгэлцлийн зарчмыг зөрчсөн ноцтой үйлдэл бөгөөд Европын Холбооны нэр хүндэд хохирол учруулна” гэж тэрбээр мэдэгджээ.
Эх сурвалж: Reuters
