Хятад улсад стратегийн чухал ашигт малтмалуудын томоохон ордуудыг нээн илрүүлсэн тухай Синьхуа агентлаг мэдээллээ.

Сычуань мужийн Мяньнин гацааны нутаг дахь Маонюпин ордод газрын ховор элементийн ислүүдийн 9,7 сая тн нэмэлт нөөцийг илрүүлэн баталгаажуулжээ. Ингэснээр уг ордын батлагдсан нөөцийн хэмжээ 10,4 сая тн-д хүрч байна. Газрын ховор элементүүдийн зэрэгцээ аж үйлдвэрт өргөн ашигладаг эрдсүүд болох флюоритын 27,1 сая тн нөөц, баритын 37,2 сая тн нөөцийг нээн илрүүлжээ. Эдгээр ордыг “хэт том” ангилалд оруулсан нь нийлүүлэлтийн сүлжээн дэх стратегийн ач холбогдлыг нь илтгэн харуулж байна.

Газрын ховор элементүүд гэдэг нь гар утас, цахилгаан автомашин болон орчин үеийн зэвсэг техник, сансрын техник зэргийг үйлдвэрлэхэд шаардлагатай 17 металлыг хэлж байгаа юм. Шинээр эдгээр элементийг илрүүлсэн нь дэлхийн зах зээл дэх Хятад улсын давамгайллыг улам бататгаж байна.

Гэхдээ флюорит ба баритын шинээр илрүүлсэн нөөц нь газрын ховор металлуудынхаас хамаагүй илүү байгаа юм. Хятадын Геологийн академийн Эрдсийн нөөцийн хүрээлэнгийн захирал Ван Дэнхоны ярьснаар, флюорит, барит хоёр бол "жинхэнэ гайхамшигтай олдворууд" ажээ. Флюоритыг хагас дамжуулагч, лити-ионы цэнэг хуримтлуулагч үйлдвэрлэхэд өргөн хэрэглэдэг бол өрмийн цамхгийг тогтворжуулахын тулд баритыг ашигладаг байна. Барит байхгүй бол занарын ордуудыг ашиглах бараг боломжгүй юм.

Үүнээс гадна Ганьсу мужийн Таньчан гацаанд 51 455 тонн сурьмагийн нөөцийг нээн илрүүлсэн тухай мэдээлжээ. Ингэснээр тус бүс нутаг дахь сурьмагийн батлагдсан нөөцийн хэмжээ 50 гаруй хувиар нэмэгдлээ.

Газрын ховор элементүүдийн дэлхийн зах зээлд давамгайлдаг Хятад улс өөрийн нөөцийг АНУ-тай хийж буй худалдааны дайнд зэвсэг болгон ашиглаж байна. Тухайлбал, өнгөрсөн оны сүүлчээр Хятадын тал 7 төрлийн газрын ховор металлын экспортод хязгаарлалт тогтоосон нь Д.Трампын засаг захиргаанаас Хятадын бараанд ногдуулсан нэмэлт татварын эсрэг хариу арга хэмжээ юм.