Дубай хотын “Аль-Ахли” баг болон улсынхаа шигшээ багт тоглодог Ираны хөлбөмбөгчин Сердар Азмун нь Израил болон АНУ-ыг дэмждэг хэмээн Ираны эрх баригчид буруутгаад түүний хөрөнгийг хураахаар төлөвлөж байна. Энэ тухай Fars агентлаг мэдээлжээ.

Өмнө нь Оросын “Зенит”, “Рубин” багуудад тоглож байсан довтлогч Азмуны нэр Ираны Голестан мужийн прокурорын газрын шийдвэрээр баривчлах, хөрөнгийг нь хураах ёстой 16 хүний нэрсийн жагсаалтад орсон байна. Гадаадад амьдардаг эдгээр хүмүүсийг “дайсны талд тусалсан” хэмээн сэжиглэж байгаа боловч ямар буруутай үйлдэл хийсэн болохыг нь дурдаагүй ажээ. Үүнтэй яг ижил үндэслэлээр Ираны хөгжимчин, хөгжмийн зохиолч, продюсер Мохсен Йегане-гийн хөрөнгийг хураасан байна.

Гуравдугаар сарын 17-нд Ираны шүүх засаглалын тэргүүн Голям Хосейн Мохсени-Эжеи мэдэгдэхдээ, Израил, АНУ-тай хамтран ажилласан, тагнуул хийсэн хэрэгт буруутгагдаж буй хүмүүсийн бүх хөрөнгийг хураана эсвэл цаазаар авах ял онооно гэжээ. Мөн Ираны цагдаагийн газрын дарга, генерал Реза Радан-ы ярьснаар, хоёрдугаар сарын 28-наас хойш хууль сахиулах байгууллагууд “дайсантай хамссан” 500 гаруй хүнийг баривчилсан байна.

Эх сурвалж: TASS