УИХ-ын Төрийн байгуулалтын байнгын хороо өнөөдөр орой /2026.03.27/ ажлын цаг дууссаны дараа хуралдаж, Монгол Улсын Ерөнхий сайдыг үүрэгт албанаас нь чөлөөлөх асуудлыг хэлэлцлээ.

Ерөнхий сайд Г.Занданшатар чөлөөлөгдөх хүсэлт гаргасан үндэслэлээ танилцуулав. Энэ үеэр дэлхий нийтийн өмнө тулгарсан нефтийн бүтээгдэхүүний хомсдол, үнийн өсөлтөөс шалтгаалсан эдийн засгийн хямралт байдалтай давхцуулсан улс төрийн гацаанаас өдөр цаг алдалгүй шуурхай хариу арга хэмжээ яаралтай авах нь чухал болсон. Иймээс улс төрийн гацаанаас гарах нь чухал гэж үзэн, Ерөнхий сайдын албан тушаалаас чөлөөлөгдөх хүсэлт гаргасан гэдгийг онцоллоо.

УИХ-ын Төрийн байгуулалтын байнгын хорооны хуралдаанд УИХ-ын дарга Н.Учрал, УИХ-ын гишүүн Д.Амарбаясгалан, Ж.Бат-Эрдэнэ, Ж.Батжаргал, Л.Гантөмөр, С.Бямбацогт, Л.Энх-Амгалан, Б.Хэрлэн, А.Ариунзаяа, Б.Батбаатар, Б.Баярбаатар, С.Зулпхар, Ц.Идэрбат, Э.Одбаяр, Н.Номтойбаяр нар оролцов.

Ерөнхий сайд Г.Занданшатараас гишүүд асуулт асууж, хариулт авсны дараа санал хураалаа. Байнгын хорооны хуралдаанд нийт 19 гишүүн оролцсоноос 16 гишүүн  буюу 84.2 хувь нь Ерөнхий сайд Г.Занданшатарыг үүрэгт ажлаасаа чөлөөлөгдөх хүсэлт гаргасныг дэмжлээ.