Ням гарагт Балбын цагдаа нар тус улсын Ерөнхий сайд асан Кхадга Прасад Шарма Олиг баривчилжээ.
Өнгөрсөн онд өрнөсөн авлигыг эсэргүүцсэн жагсаалыг хүч хэрэглэн дарсан хэргийг мөрдөн шалгах явцад албан үүрэгтээ хайнга хандсан гэх үндэслэлээр Ерөнхий сайд асныг хариуцлагад татах тухай түр засгийн газраас байгуулсан комиссын зөвлөмжийн дагуу түүнийг баривчилсан байна.
Балбын Коммунист намын дарга, өдгөө 74 настай Олиг жагсагчид руу гал нээсэн аюулгүй байдлын хүчнийхний үйлдлийг зогсоогоогүй гэж бургуутгаж байгаа бөгөөд үүний улмаас 76 хүн амиа алджээ.
Балбын Засгийн газар нийгмийн сүлжээ ашиглахыг хориглосны дараа гол төлөв залуучууд өнгөрсөн оны есдүгээр сард эсэргүүцлийн жагсаал зохион байгуулсан юм.
Оли хүний амь насыг хохироох санаа зорилго агуулаагүй хэдий ч аюулгүй байдлын хүчнийхэн жагсагчид руу, тэр дундаа насанд хүрээгүй хүүхдүүд рүү гал нээхээс сэргийлж чадаагүй нь хүний амь нас эрсдэхэд хүргэсэн гэж дээрх комисс дүгнэжээ.
Энэхүү баривчилгааг шинээр байгуулагдсан “Үндэсний хараат бус нам”-ын (Растрия Сватантра) дарга Балендра Шах тэргүүтэй шинэ засгийн газар тангараг өргөсөн өдрийн маргааш явуулжээ. Тус нам энэ сарын эхээр болсон парламентын сонгуульд итгэл төгс ялсан байна.
Олигийн удирддаг Коммунист намаас уг баривчилгааг хууль бус өшөө авалт гэж мэдэгдээд, түүнийг нэн даруй суллахыг шаарджээ.
Эх сурвалж: NHK
