Монголын төдийгүй дэлхийн хөдөлмөрийн зах зээлд сүүлийн үед анхаарал татсан сэдэв болж, энэ талаарх судалгааг хийж буй үе судлал, тэр дундаа Z үеийнхэн, тэдний сэтгэл ханамжид нөлөөлөх хүчин зүйлсийн судалгааг Улаанбаатар эрдэм их сургуулийн Эдийн засаг, бизнесийн сургуулийн багш Б.Билгүүн хийжээ.
Тэрбээр Монгол Ардын намын Удирдах зөвлөлийн дэргэд ажиллаж буй бодлогын хороодоос зохион байгуулдаг “Policy meeting” цуврал хэлэлцүүлгийн уулзалтын зочноор оролцон орчин үеийн сонирхолтой судалгааны бүтээлийнхээ онцлох хэсгүүдээс танилцуулсан байна.
Эхлээд нийгмийн үе хоорондын ялгаатай байдлыг, дараа нь сэтгэл ханамжид нөлөөлсөн хүчин зүйл юу вэ гэдгийг хөдөлмөр эрхэлж буй Z үеийнхнээс асуумж авч судалгаагаа боловсруулжээ.
Z үеийнхэн гэдэг 1997-2012 онд төрсөн хүмүүс хамаарч байгаа ба манай монголын нийт хөдөлмөрийн зах зээлийн 20 орчим хувийг эзэлж байна.
Тэд шударга, үнэнч, өөрчлөгдөх чадвартай, нэг ажлын байрандаа удаан ажиллах сонирхолгүй, цагийн уян хатан байдлыг илүүд үздэг гэх зэрэг үндсэн шинжээрээ өсвөр үеэсээ ялгаатай.
Мөн төр, хувийн хэвшлийн ялгаатай орчин нөхцөлд Z үеийнхэн хэрхэн ханддаг вэ, ажлын ямар орчныг сонгож удаан ажилладаг эсвэл тогтворгүй өөрчлөгддөг вэ зэргийг судалгаанд дурджээ.
