Ерөнхий боловсролын сургуулийн сурагчдын дунд үе тэнгийн дээрэлхэлтийн талаар нээлттэй мэдээлэх “Надад туслаач” сувгийг туршилтаар ажиллуулж байна. ЕБ-ын 16, Од, Цайхун, Шарын гол сумын хоёрдугаар сургуульд ажиллаж сурагчдаас мэдээлэл авч байна.

Энэ хичээлийн жилд туршилтаар дөрвөн сургуульд хэрэгжүүлж сайжруулалт хийх нөхцөлийг тодорхойлж, ирэх хичээлийн жилээс бүх сургуульд ажиллуулахаар төлөвлөжээ.

Тус нээлттэй сувгийг аймгийн Цагдаагийн газар, Прокурорын газар, Хүүхэд, гэр бүл, хөгжил хамгааллын газар, Боловсролын газар хамтран хэрэгжүүлж цахим платформ юм.

Зурагт харагдах QR кодыг гар утсаараа уншуулахад “Надад туслаач”  буюу үе тэнгийн дээрэлхэлтийн талаарх гомдол, мэдээлэл авах нээлттэй групп гарч ирнэ.

Мэдээлэл өгөх хэсэгт мэдээлэл илгээж буй сурагчийн овог, нэр, утасны дугаар зэрэг ерөнхий мэдээллийг судалгаа хэлбэрээр бөглөхөөр байрлуулжээ.

Асуумжийг бөглөсний дараагаар хэзээ, хаана, хэдэн цагт үе тэнгийн дээрэлхэлтийг харснаа болсон үйл явдалтай нь бичих юм. Тухайлбал бие махбод, зодох, чимхэх, үг хэлээр доромжлох зэрэг агуулгыг бичнэ.

Эдгээр дээрэлхэлтийн төрлүүдийг төрлөөр нь ангилж бичих цонхтой бөгөөд түүн дээр дарж өөрийнхөө харсныг бичих юм.

Туршилтаар хэрэгжүүлж буй уг цахим платформыг бүх сургуулиудад ашиглаж эхэлбэл хүүхдүүдийн дунд ил, задгай үйлдэгддэг дээрэлхэлт багасна гэж туршилт хэрэгжүүлж буй сургуулийн багш нар онцолж байна.

Дээрэлхэлтийг хараад өнгөрөх бус дээрэлхэлтийн мэдээллийг түгээдэг, хэн нэгнийг бэртэж гэмтэх, сэтгэл санааны гутралд орох зэргээс урьдчилан сэргийлэх боломжийг бий болгон хөгжүүлж буй платформ юм.