Соёл, спорт, аялал жуулчлал, залуучуудын яамны “Соёлын боловсрол-Нэг Монгол” нээлттэй хаалганы өдөрлөг жанжин Д.Сүхбаатарын талбайд өнөөдөр эхэллээ.

Өдөрлөгт 27 байгууллагын 400 орчим хүн хамрагдсан бол тэнд тамирчин, дасгалжуулагч нар идэвхтэй, тогтмол дасгал хөдөлгөөн хийсний дүнд эрүүл мэндэд эерэг нөлөө үзүүлсэн сайн туршлагаасаа хуваалцаж байна. Түүнчлэн үндэсний шигшээ багийн тамирчид тив, дэлхийн тавцанд эх орныхоо нэрийг өндөрт мандуулах замдаа туулсан бэрхшээл, уйгагүй хөдөлмөрийнхөө үр шимээр алдрын оргилд гарсан замналаа хуучлахаас гадна нийтийн биеийн тамир тамирыг сурталчилан таниулах чиглэлээр “Шугаман бүжиг”, “Uuree dance” бүжгийн үзүүлэх тоглолт, аэробик, таеквондо, гимнастик, спортын дунд сургуулийн үзүүлэх тоглолт зохион байгуулж байна. Мөн Спортын анагаах ухаан, эрдэм шинжилгээний төвөөс сорил авч зөвлөгөө өгсөн бөгөөд хоол зүй, биеийн жингийн индекс тодорхойлох үйлчилгээ үзүүлж байна.

ССАЖЗЯ-ны Төрийн нарийн бичгийн дарга Б.Бат-Эрдэнэ “Соёл-оюун санааны дархлаа, спорт-эрүүл амьдралын суурь, аялал жуулчлал-эдийн засгийн гарц, залуучууд-ирээдүй юм” нээлтийн үгэндээ онцлов.

Гурван өдөр үргэлжлэх эл өдөрлөгөөр дөрвөн салбарын үйлчилгээг нэг дороос авах боломжтой. Тухайлбал, соёлын урлагийн тоглолт, VR аялал, хүүхдийн хөтөлбөр, бие бялдрын сорил, сэтгэл зүй, хооллолтын зөвлөгөө, “Go Mongolia” брэнд, аяллын шинэ чиглэлүүд, хуулийн хэлэлцүүлэг, “Youth cart”, үзэсгэлэнг зохион байгуулж байна.