2022 онд байгуулагдсан Тэрбум мод сан өнөөдрийн байдлаар 3,5 сая мод тарьж, 90 хувь нь ургаад байна.
Өмнө нь Сэлэнгэ аймгийн Алтанбулаг сумын шатсан ойг нөхөн сэргээсэн юм. Ингэснээр 3,2 сая модыг тарьж ургалтад нь хяналт тавин ажиллаж байна. Энэ хавар хангайн бүсийн ойн сан бүхий Архангай, Завхан, Булган, зүүн бүсээс Хэнтий болон Дорнод аймагт уулын ойжуулалт хийхээр ажлаа эхлүүллээ.
Хамтран ажиллах гэрээнд Тэрбум мод сангийн Гүйцэтгэх захирал Б.Баярмаа болон ойжуулалт хийх аймаг, сумдын засаг дарга нар, мөн аймгийн байгаль орчны газрын дарга, сум дундын ойн анги, ойн мэргэжлийн ААН-үүдийн удирдлагууд гарын үсэг зурж баталгаажуулав.
Гэрээг гурван жилийн хугацаатай байгуулж, ойжуулалтын ажлыг мэргэжлийн байгууллагаар гүйцэтгүүлэх бөгөөд гурван жилийн дараа гэрээнд заасан тоо ёсоор нь Ойн санд модоо хүлээлгэн өгөх юм. Сонгосон таван аймаг нь Монгол орны ойн сан бүхий аймгууд бөгөөд хүний буруутай үйлдлээс болж, шатсан эсвэл хууль бусаар их хэмжээгээр мод бэлтгэж, доройтсон ойг нөхөн сэргээх юм. Ийнхүү доройтсон ойг нөхөн сэргээх зорилгоор томоохон талбайг хамарсан уулын ойжуулалт хийх нь биологийн олон янз байдлыг хамгаалах улмаар мод нь тухайн нутгийнхаа усны эх ундарга болсон цэвдгийг барьж байдаг тул экологийн тэнцвэрт байдлыг хадгалахад чухал ач холбогдолтой. Эдгээр газарт уулын ойжуулалтыг цаг алдалгүй хийхгүй бол ойн хэв шинжээ алдаж, хээрших эрсдэлтэй тул ийнхүү дээрх аймгуудад ойжуулалтын ажлыг эхлүүлж байна.
Гэрээнд заасан модоор ойн сан хүрээгээ тэлснээр байгаль экологид төдийгүй тухайн орон нутгийн аж ахуйн нэгжүүд эдийн засгийн хувьд бэхжиж, энэ салбарт цаашдаа тогтвор суурьшилтай ажиллах үндэс суурь нь болно. Иймээс аймаг, сумын нийгэм эдийн засгийн хөгжилд ч Тэрбум мод сан хувь нэмрээ оруулж байгаа юм.
