Баян-Өлгий аймгийн Алтай сум болон Өлгий сумын 4 дүгээр багт малын гоц халдварт шүлхий өвчний сэжигтэй тохиолдол илэрч, лабораторийн шинжилгээгээр батлагдсантай холбогдуулан аймгийн Онцгой комисс шуурхай хуралдаж, хорио цээрийн дэглэм тогтоох шийдвэр гаргалаа.
Шийдвэрээр Өлгий-Бугат, Өлгий-Алтай чиглэлийн авто замын хөдөлгөөнийг тодорхойгүй хугацаагаар бүрэн хязгаарлаж, халдварын тархалтыг хумих зорилгоор хяналт, хамгаалалтын дэглэмийг хэрэгжүүлж эхэлжээ.
Мөн Алтай, Бугат сумын төвийн 3, 5 дугаар баг болон халдварын эрсдэлтэй бүсүүдэд байнгын хяналтын постууд ажиллуулж байна. Эдгээр постод Онцгой байдал, Цагдаа, Мал эмнэлэг, Эрүүл мэндийн байгууллагын алба хаагчид хамтран үүрэг гүйцэтгэж, ариутгал, халдваргүйжүүлэлтийн ажлыг зохион байгуулж байна.
Постуудад Онцгой байдал, Цагдаа, Мал эмнэлэг, Эрүүл мэндийн байгууллагын алба хаагчид хамтран үүрэг гүйцэтгэж, ариутгал халдваргүйтгэлийг тасралтгүй зохион байгуулна.
Үүнээс гадна олон нийтийг хамарсан үйл ажиллагаа, уулзалт, баяр ёслол, спортын тэмцээн зохион байгуулахыг тодорхойгүй хугацаагаар хориглолоо. Одоогоор өвчний голомтын бүсэд тандалт, хяналтыг эрчимжүүлж, халдварын тархалтыг тогтоох, эрсдэлийг бууруулах арга хэмжээг шат дараатай авч байна.
Аймгийн Онцгой комиссоос иргэд, малчдыг мэргэжлийн байгууллагын заавар, зөвлөмжийг чанд мөрдөх, дур мэдэн зорчихгүй байх, баталгаагүй мэдээлэл түгээхгүй байхыг анхаарууллаа.
