Барилгын салбарт даатгалын тогтолцооны хууль эрх зүйн орчныг сайжруулах шаардлагын талаар даатгуулагч аж ахуйн нэгжүүдийн төлөөлөл хэлэлцүүлэг өрнүүллээ.
Тухайлбал, даатгалын салбарын өнөөгийн нөхцөл байдал, хууль тогтоомжийг шинэчлэх хэрэгцээ, шаардлага, нөхөн төлбөр олголт, бүтээгдэхүүн хөгжүүлэлтийн эрэлт хэрэгцээ, технологийн дэвшлийг нэвтрүүлэх талаар төр болон хувийн хэвшлийн төлөөллүүд санал, байр сууриа илэрхийлснийг МҮХАҮТ мэдээлэв. Хэлэлцүүлэгт УИХ-ын гишүүн Б.Пунсалмаа, Л.Энхнасан, П.Ганзориг, МҮХАҮТ-ын Ерөнхийлөгч Б.Лхагважав оролцож, даатгалын салбарын шинэчлэлийн зорилго, УИХ-аас байгуулсан ажлын хэсгийн талаар мэдээлэл өгч, бизнес эрхлэгч, салбарын төлөөллийн саналыг сонсжээ.
Монголын Барилгачдын Нэгдсэн Холбооны гүйцэтгэх захирал Б.Өлзийбат ярихдаа, “Барилгын салбарын даатгагчийн баталгаа, үйлчилгээ, хууль эрх орчныг сайжруулах, барилгын компаний санхүүг дэмжих, даатгалын бүтээгдэхүүн, үйлчилгээг өргөжүүлэх, ногоон даатгалын үйлчилгээг нэвтрүүлэх, даатгагчийн баталгааны эрэлт, нийлүүлэлтийг холбох, хамтын ажиллагааны нөхцөлийг уян хатан байлгах талаар даатгалын компани, баталгааны зах зээлийг зохицуулах Хамтын зөвлөлтэй хамтран ажиллаж байгаа. Даатгалын компаниуд барилгын салбарын аж ахуйн нэгж, байгууллагатай мэдээллээ нээлттэй хуваалцах дундын мэдээллийн нэгдсэн сан бүрдүүлэхээр зорьж байгаа”-г онцлов. Ингэхдээ олон улсын сайн жишгийг нутагшуулах, барилгын салбарт зураг төсөл боловсруулахаас эхлэн барилга угсралт, ашиглалтад хүлээлгэн өгөх хүртэлх бүх шатанд даатгал нэвтрүүлж, энэ чиглэлийн хууль, эрх зүйн орчныг оролцогч талуудын эрх ашгийг ханган боловсронгуй болгох шаардлагатайг тодотгожээ.
Барилгын салбар баталгааны даатгалын 75 хувийг эзэлдэг ч 80 гаруй тэрбум төгрөгийн баталгаанаас 400 орчим саяыг гаргасан нь эрсдэл бага байгааг харуулж байна. Иймд шимтгэлийн хувь хэмжээг багасгах, мөн бодит жишээгээр урьдчилгаа төлбөрийн баталгааг богино хугацаанд хаасан тохиолдолд үлдэгдэл шимтгэлийг буцааж зохицуулах боломжийг судлах саналаа оролцогчид хэлэв. Мөн барилгын салбарт гүйцэтгэл, тендер, урьдчилгаа төлбөр, чанарын гэсэн дөрвөн төрлийн баталгаа байдгаас эрсдэл бага баталгаануудад шимтгэлийн бодлогыг уян хатан болгох шаардлагатай байгаа ажээ.
