Европын Холбооны (ЕХ) гишүүн бүх улс орон Украин, Молдова улсуудыг элсүүлэх тухай хэлэлцээний хүрээнд эхний үе шатыг эхлүүлэхийг зөвшөөрсөн тухай Европын Комиссын дарга Урсула фон дер Ляйен, Европын Зөвлөлийн дарга Антониу Кошта нар баасан гаригийн орой мэдэгджээ. Ингэснээр тус хоёр улсыг эгнээндээ элсүүлэх тухай албан ёсны хэлэлцээ зургаадугаар сарын 15-ны өдрөөс эхэлнэ. 

Украин, Молдова улсуудыг ЕХ-ны гишүүнээр элсүүлэх хэлэлцээний эхний үе шат эхэлж байгаа нь "асар их хүндрэл бэрхшээлийг үл харгалзан шинэчлэл хийхэд хоёр улсын харуулсан шийдэмгий байдал, зориг тэвчээр, шаргуу хөдөлмөрийг хүлээн зөвшөөрч буй хэрэг юм" гэж хоёр улс төрч мэдэгджээ. Түүнчлэн тэд ЕХ-г өргөжүүлэх шийдвэрийг "тодорхойгүй байдал улам бүр нэмэгдэж буй" өнөөгийн дэлхий ертөнцөд Европын орнуудын нийтлэг ашиг сонирхолд нийцсэн "стратегийн шийдвэр" хэмээн тодорхойлсон байна.

ЕХ-ны Зөвлөлийг энэ онд даргалж буй Киприйн төлөөлөгчийн газраас мэдээлснээр, Унгар улс хоригоо цуцалсны дараа ЕХ-ны орнууд хэлэлцээний эхний бүлэг сэдвээр нэгдсэн байр сууринд хүрснээр шаардлагатай бэлтгэл ажил бүрэн дуусжээ.

Хэлэлцээний эхний бүлэг сэдэв нь ЕХ-нд элсэхийн тулд тухайн улс орнуудын заавал дагаж мөрдөх ёстой үнэт зүйлс, суурь зарчмуудын тухай ажээ. Нийтдээ хэлэлцээг хэдэн арван хэсгээс бүрдэх зургаан гол сэдвийн хүрээнд хийнэ. Хэлэлцээ бүрэн дууссаны дараа шинэ орнуудыг элсүүлэх шийдвэрийг гишүүн 27 улс бүгд соёрхон батлах ёстой.

Украин, Молдова улсуудыг ЕХ-нд элсүүлэх хэлэлцээ анх 2024 оны зургаадугаар сард эхэлж байсан юм. Унгарын өмнөх засгийн газар хориг тавьснаар Украинтай хийх албан ёсны хэлэлцээ гацаад байсан бөгөөд шинжээчдийн түвшинд албан бусаар үргэлжилж байв. Харин Унгарын шинэ Ерөнхий сайд Петер Мадьяр өнгөрсөн долоо хоногт Украины талтай унгар үндэстний цөөнхийн эрхийг хамгаалах талаар тохиролцоонд хүрснээ мэдэгдэж, ЕХ-ны хэлэлцээнд тавиад байсан хоригоо цуцалсан байна.