Швейцарын иргэд улсынхаа хүн амын тоог 10 саяд хязгаарлах тухай барууны үзэл баримтлалтай Швейцарын ардын намын (SVP) дэвшүүлсэн санаачилгыг бүх нийтийн санал асуулгаар дэмжсэнгүй.
Тус улсын Статистикийн газраас (BFS) мэдээлснээр, хүн амын тоог хязгаарлах санал буюу SVP намын нэрлэснээр "тогтвортой хөгжлийн санаачилга"-ыг санал асуулгад оролцогчдын 45 хувь нь дэмжсэн бол 55 орчим хувь нь эсэргүүцсэн санал өгчээ.
Одоогоор Швейцарт 9.1 сая орчим хүн амьдарч байна. Хэрэв уг санал дэмжигдсэн бол 2050 он гэхэд хүн ам 9.5 саяас давсан тохиолдолд Засгийн газар болон парламент хүн амын тоог хязгаарлах шаардлагуудыг хэрэгжүүлэх арга хэмжээ авах үүрэг хүлээх байв. Тухайлбал, цагаачдад оршин суух эрх олгох, мөн гэр бүлийнхэнтэйгээ амьдрахаар шилжин суурьшихтай холбоотой олон улсын гэрээнүүдийг эргэж харах, цаашлаад Европын Холбооны гишүүн орнуудтай байгуулсан "Чөлөөтэй зорчих хэлэлцээр"-ийг цуцлах хүртэл арга хэмжээ авах үүрэг хүлээх байв.
Үүний зэрэгцээ Швейцарын иргэд цэргийн албыг зэвсэггүй иргэний албаар солих үйл явцыг хүндрүүлэх санаачилгыг багахан зөрүүгээр дэмжжээ. Урьдчилсан дүнгээс үзвэл, санал өгсөн иргэдийн 53 орчим хувь нь уг санаачилгыг дэмжсэн бол 47 орчим хувь нь эсэргүүцсэн байна.
2025 онд зэвсэггүй иргэний алба хаах зөвшөөрөл авсан хүмүүсийн тоо өмнөх онынхоос 6.1 хувиар өсөж, 7211-д хүрсэн нь түүхэн дэх хамгийн өндөр үзүүлэлт болсон талаар "SWI swissinfo.ch" мэдээлжээ. Өмнөх дээд үзүүлэлт 2010 онд бүртгэгдэж байсан бөгөөд тухайн үед 6826 хүн ийм зөвшөөрөл авч байжээ.
