Монгол Улсын Засгийн газрын 2024-2028 оны үйл ажиллагааны хөтөлбөрт Зүүн бүсийг түүхэн аялал жуулчлалын бүс болгон хөгжүүлэх зорилт тусгасан. Энэ зорилтын хүрээнд Бичигт боомтын төв замаас аялал жуулчлалын гол бүс нутаг болох Дарьганга чиглэлийн хатуу хучилттай авто замын ажлыг албан ёсоор эхлүүллээ.
Тус төсөл нь 2026-2028 онд хэрэгжих бөгөөд Бичигт боомтын төв замыг Дарьгангын байгалийн болон түүх, соёлын аялал жуулчлалын бүстэй холбох 136.9 км хатуу хучилттай авто замын эхний үе шат юм.
Тус зам нь Баруун-Урт-Бичигт чиглэлийн улсын чанартай А/2002 дугаартай авто замын 111.3 дахь километрээс, Улаан хужирын нурууны баруун хойд талаас эхэлж, Шилийн Богдоос хойш ойролцоогоор 30 километрийн зайд төгсөнө. Замын бүтээн байгуулалтын хийц нь 5 см зузаан асфальт бетон хучилт, 22 см цементээр бэхжүүлсэн суурь, 30 см суурийн доод үе бүхий нийт 75 см зузаан бүтэцтэй байхаар төлөвлөжээ.
Төслийн багц-1 нь 16.99 км, багц-2 нь 17.96 км буюу нийт 34.95 км авто зам барихаар төлөвлөжээ. Нийт төсөвт өртөг нь багц-1-д 29.3 тэрбум, багц-2-т 28.5 тэрбум төгрөг бөгөөд Монгол Улсын 2026 оны улсын төсөвт багц-1-д 7.57 тэрбум, багц-2-т 7.37 тэрбум төгрөгийн санхүүжилтийг тус тус баталсан байна.
Зам, тээврийн яамнаас зохион байгуулсан тендерийн сонгон шалгаруулалтаар замын гүйцэтгэгчээр “Өвөр Монголын Зам Гүүр Групп” ХХК шалгарч, 5 дугаар сарын 14-ний өдөр ажил гүйцэтгэх гэрээг байгуулжээ.
Тус төсөл хэрэгжсэнээр Дарьгангын байгалийн цогцолборт газар, Шилийн Богд болон зүүн бүсийн аялал жуулчлалын гол бүсүүдийн хүртээмж сайжирч, орон нутгийн эдийн засаг, аялал жуулчлалын хөгжилд бодитой хувь нэмэр оруулах юм.
