Тавдугаар сарын сүүлчээс хойш нефть бүтээгдэхүүний нийлүүлэлтэд үүссэн хямрал үргэлжилсээр буй энэ үед Оросын засгийн газар 7 дугаар сарын 8-31 хүртэлх хугацаанд дизель түлшний экспортыг зогсоох шийдвэр гаргасан байна. Энэ тухай өчигдөр шадар сайд А.Новак засгийн газрын гишүүдийн ерөнхийлөгч В.Путинтэй хийсэн уулзалтын үеэр мэдэгджээ.

Засгийн газрын хэвлэлийн албаны мэдээлснээр, бензин, дизель болон бусад төрлийн түлш шатахууны экспортод энэ оны 1 дүгээр сарын сүүлчээс хязгаарлалт тогтоосон байна. Гэхдээ энэ нь үйлдвэрлэгчдэд хамаарахгүй байжээ. Харин одоо 7 дугаар сарыг дуусталх хугацаанд үйлдвэрлэгчдийн зүгээс дизель түлш, хөлөг онгоцны түлш, газойлыг экспортлох боломжгүй болжээ. “Түлш шатахууны дотоодын зах зээл дэх нөхцөл байдлыг сайжруулах үүднээс энэхүү шийдвэрийг гаргалаа. Гэхдээ энэ нь засгийн газар хоорондын олон улсын гэрээгээр нийлүүлж буй дизель түлшинд хамаарахгүй” гэдгийг мэдээлэлд дурдсан байна.

Тавдугаар сарын сүүлчээс хойш Оросын нефть боловсруулах үйлдвэрүүд, түлш эрчим хүчний цогцолборууд руу хийж буй Украины дронуудын дайралтын улмаас Орос улсад бензин, дизель түлш эрс хомсоджээ.  Тус улсын 60 бүс нутагт түлш шатахууны хомсдол үүсэж, хэрэглээнд хязгаарлалт тогтоосон байна.

Үүний сацуу Оросын эрх баригчид гадаадаас худалдан авч буй нефтийн бүтээгдэхүүний хэмжээг нэмэгдүүлж байгаа ажээ. Тухайлбал, Энэтхэг улс далайгаар 60 мянган тонн бензинийг Орост нийлүүлсэн бол Казахстантай хэлэлцээ хийж байна. Мөн Оросын тал трейдерүүдээр дамжуулан Японоос онгоцны түлш авахаар төлөвлөж байгаа ажээ.

Түүнчлэн, Оросын засгийн газар хүхрийн агууламж өндөртэй “Евро-3” стандартын шатахууныг дотоодын зах зээлд борлуулахыг зөвшөөрсөн байна.