/TASS/ Энэтхэгийн Ерөнхий сайд Нарендра Моди улсын шалгалтын тогтолцоог шинэчлэх тусгай ажлын хэсэг байгуулснаа мэдэгджээ. Тус ажлын хэсгийг Энэтхэгийн мэдээллийн технологийн томоохон компаниудын нэг болох "Infosys" компанийг хамтран үүсгэн байгуулагч, Төлөөлөн удирдах зөвлөлийн дарга Нандан Нилекани ахална.

"Манай улсад орчин үеийн технологийг хамгийн өргөн хүрээнд ашигласан, найдвартай, ил тод шалгалтын тогтолцоог бүрдүүлэх шаардлагатай байна. Иймээс дэлхийд нэр хүндтэй технологийн мэргэжилтэн Нандан Нилеканигийн удирдлага дор шалгалтын тогтолцоог шинэчлэх өндөр түвшний ажлын хэсэг байгуулахаар шийдвэрлэлээ" гэж Н.Моди Х нийгмийн сүлжээний хуудсандаа нийтэлсэн дүрс бичлэгтээ мэдэгджээ.

Шинээр байгуулж буй ажлын хэсэг нь "богино хугацаанд тайлан боловсруулж, түүнд үндэслэн ирэх шалгалтуудын найдвартай байдлыг хангах арга хэмжээг авч хэрэгжүүлнэ" гэдгийг тэрбээр онцолсон байна.

Н.Моди мөн шалгалтын сэдэв задарсантай холбоотой дуулианы дараа сурагчдын эрх ашгийг хамгаалахын тулд түүний Засгийн газар үргэлжлүүлэн ажилласаар байгаа гэдгийг онцлон тэмдэглэсэн байна. "Оюутнуудын ирээдүйгээр тоглосон хүмүүс өнөөдөр шоронд ял эдэлж байна. Бид түргэвчилсэн журмаар хэргийг шийдвэрлэх шүүх байгуулсан. Маргааш парламентаар хатуу хариуцлага тооцох заалтыг тусгасан шинэ хуулийн төслийг үргэлжлүүлэн хэлэлцэнэ" гэж тэрбээр хэлжээ. 

Н.Нилекани бол Энэтхэгийн цахим шилжилтийн гол санаачлагчдын нэг юм. Тэрбээр 2009-2014 онд Энэтхэгийн Улсын бүртгэлийн газрын даргын албан тушаалыг хашиж байхдаа дэлхийд хамгийн том биометрийн цахим таних систем болох "Aadhaar"-ийг байгуулах ажлыг удирджээ. Тэрбээр мөн тус улсын дижитал дэд бүтцийг хөгжүүлэхэд гол үүрэг гүйцэтгэсэн байна. 

Шалгалтын сэдэв задарсан дуулиан

Энэ оны тавдугаар сард Энэтхэг даяар анагаахын их, дээд сургуулиудын элсэлтийн NEET-UG шалгалтыг зохион байгуулж, 550 гаруй хотод 2.2 сая гаруй шалгуулагч оролцсон байна.

Гэвч шалгалтын сэдэв задарсан нь тогтоогдсоны дараа дүнг хүчингүй болгосон нь өндөр оноо авсан олон мянган элсэгчид хүнд цохилт болсон бөгөөд үүнтэй холбоотойгоор амиа хорлосон тохиолдлууд ч бүртгэгдсэн байна. Улмаар Энэтхэгийн олон хотод эсэргүүцлийн жагсаал өрнөж, дахин шалгалтыг зургаадугаар сард явуулжээ.

Долдугаар сарын 20-нд залуучуудын "Cockroach Janta Party" хөдөлгөөн Шинэ Дели хотын төвд жагсаал зохион байгуулж, түүнд хэдэн мянган хүн нэгджээ. Жагсагчдын гол шаардлага нь Боловсролын сайд Дхармендра Прадханыг огцруулах байсан бөгөөд тэд шалгалтын дуулианд сайдыг хариуцлага хүлээх ёстой гэж үзсэн байна. Түүнчлэн шалгалтын дүнг хүчингүй болгосны дараа амиа хорлосон элсэгчдийн ар гэрт нөхөн олговор олгох, жагсаалд оролцогчдыг эрүүгийн хариуцлагад татахаа зогсоохыг шаарджээ. Хэдэн өдөр үргэлжилсэн хэлэлцээний эцэст Прадхан огцорч, эрх баригчид жагсагчдын бусад шаардлагыг биелүүлэхийг зөвшөөрсөн байна.