/Reuters/ АНУ-ын Ерөнхийлөгч Дональд Трамп Ирантай даваа гаригт хэлэлцээ хийнэ гэж мэдэгдсэн боловч тохиролцоонд хүрэх хугацааг хэлэхээс татгалзсан байна. Тэрбээр үүний өмнөхөн Ормузын хоолойг дахин нээх, Тегераны цөмийн асуудлыг шийдвэрлэхийн тулд болзошгүй халдлагыг цуцалсан гэж мэдэгдээд байсан юм. 

Трамп бямба гаригийн орой “Truth Social” платформ дээр Иран болон Ойрх Дорнодын бусад орнууд Ормузын хоолойг "Нэн даруй,  Нэгмөсөн" дахин нээх, "Ираны цөмийн аюулыг зогсоох" хэлэлцээг дуусгахад тодорхой хугацаа хүссэн боловч Тегеран "нэн даруй ХЭЛЭЛЦЭЭ хийх ёстой" гэж мэдэгджээ.

Д.Трамп ням гаригт Вашингтонд ирсэн даруйдаа сэтгүүлчдэд хандан, хэлэлцээ даваа гарагийн үдээс хойш эхэлнэ гэж мэдэгдсэн боловч хаана болох, хэн оролцох талаар дэлгэрэнгүй мэдээлэл өгсөнгүй. 

Иранд тохиролцоонд хүрэх эцсийн хугацаа өгсөн эсэхийг асуухад Трамп хариулахаас татгалзсан байна. Харин хариуд нь "Намайг хэлэлцээр хийхийг илүүд үзэх байсан уу гэж үү? Хүмүүс үхэж байгаа учраас би хүмүүсийг алахыг хүсэхгүй байна, маш олон хүн үхэж байна, бид үүнийг хүсэхгүй байна" гэж Трамп хэлэв. 

Трамп хоёрдугаар сарын сүүлээр Израилтай хамтран Ираны эсрэг эхлүүлсэн дайныг улам өргөжүүлнэ гэж удаа дараа сүрдүүлж байсан боловч хэлэлцээнд илүү цаг хожихыг хүсэж байсан бололтой. Одоогоор хэлэлцээ хийж эхлээгүй байна.