Боловсролын яамны Төрийн нарийн бичгийн дарга Т.Ням-Очир БНСУ-ын Чүннам мужийн Боловсролын газрын төлөөлөгчдийг хүлээн авч уулзлаа.
Уулзалтын үеэр Нийслэлийн ерөнхий боловсролын 133 дугаар сургуульд хэрэгжүүлсэн ухаалаг самбар болон Chromebook төхөөрөмжийн дэмжлэгийг үргэлжлүүлэн бусад сургуульд нэвтрүүлэх боломжийн талаар санал солилцов. Мөн мэдээллийн технологийн дэмжлэг авсан сургуулийн багш нарыг Монгол Улсад зохион байгуулах сургалтад хамруулах, БНСУ-д хиймэл оюун, боловсролын технологийн чиглэлээр туршлага судлах боломжийг өргөжүүлэхэд хамтран ажиллах талаар ярилцжээ.
Талууд өмнө нь мэдээллийн технологийн чиглэлээр удирдлагын түвшний туршлага судлах сургалтыг хэрэгжүүлж, хоёр жилийн хугацаанд 7-8 албан хаагчийг богино хугацааны сургалтад хамруулсан үр дүнтэй хамтын ажиллагааг онцолсон юм. Энэхүү хамтын ажиллагааг цаашид үргэлжлүүлэн өргөжүүлж, туршлага судлах сургалтын хөтөлбөрийг тогтмол хэрэгжүүлэхээр талууд санал нэгдсэн талаар Боловсролын яамнаас мэдээлэв.
