УИХ-ын гишүүн Н.Алтанхуяг өнгөрөгч баасан гаригт /2026.08.23/ Цөлжилттэй тэмцэх тухай НҮБ-ын конвенцын Талуудын 17 дугаар бага хурал оролцож буй Израил Улсын төлөөлөгчдийн тэргүүн, Израилын Олон улсын хөгжлийн агентлаг (МАШАВ)-ийн дарга, Элчин сайд хатагтай Э.Шлейнийг хүлээн авч уулзав.

Хатагтай Э.Шлейн цаг гарган хүлээн авсан УИХ-ын гишүүн Н.Алтанхуягт талархаад, 1991 онд Израил Улс, Монгол Улстай тогтоосон дипломат харилцаа тогтмол урагшилж улам эрчимжиж ирснийг шинэ түвшинд хүргэх, бэхжүүлэх хамтын ажиллагааны талаар санал солилцох боломж гарч буйд сэтгэл хангалуун байгаагаа илэрхийллээ. Тэрбээр манай хоёр улс яам болон холбогдох байгууллагын түвшинд харилцан айлчлал хэрэгжүүлж, төлөөлөл тогтмол солилцож, хөдөө аж ахуй, байгаль орчин, эрчим хүч, өндөр технологи, боловсрол зэрэг тодорхой салбарт амжилттай хамтран ажиллаж ирснийг тэмдэглээд, цаашид ч эдгээр салбарт харилцан ашигтай хамтын ажиллагаагаа үргэлжлүүлэхэд Израилын Олон улсын хөгжлийн агентлаг чухал хувь нэмэр оруулах боломжтойг танилцуулав.

Уулзалтад байлцсан Израил Улсаас Монгол Улсад хавсран суугаа Элчин сайд Элиав Белоцерковский Монгол Улс Израилын Олон улсын хөгжлийн агентлагийн харилцан ашигтай хамтын ажиллагаа урам өргөжих боломж байгааг дурдлаа. Хоёр улсын харилцаа, хамтын ажиллагааг шинэ шатанд гаргах, бэхжүүлэх санаачилгад талархаж буйгаа УИХ-ын гишүүн Н.Алтанхуяг илэрхийллээ.

Израил Улсаас суралцах, хамтран ажиллах орон зай байгааг тэрбээр тэмдэглээд хөдөө аж ахуй, боловсролын салбар дахь хамтын ажиллагааны боломжийн талаар дэлгэрэнгүй байр сууриа илэрхийллээ. Тэрбээр “Цөлжилттэй тэмцэх тухай НҮБ-ын конвенцын Талуудын 17 дугаар бага хуралд оролцохын сацуу монгол малчны хотонд зочилж, яриа өрнүүлбэл илүү бодитой, сонирхолтой хамтын ажиллагааны санал санаачилга сонсоно гэдэгт итгэлтэй байна” хэмээв.

Үргэлжлүүлэн талууд хоёр улсын парламент хоорондын хамтын ажиллагаа идэвхтэй байгааг онцлоод, аялал жуулчлал, боловсрол, иргэд хоорондын харилцааг өргөжүүлэн, эрчимжүүлэх талаар санал солилцлоо.