/Kyodo/. “Honda Motor Co.” компани гибрид буюу хосолмол хөдөлгүүртэй тээврийн хэрэгслийн үйлдвэрлэлээ нэмэгдүүлэхийн тулд АНУ-д шинэ угсрах үйлдвэр барихаар судалж байгаагаа мягмар гарагт мэдэгдэв. Тус компани цахилгаан тээврийн хэрэгслийн бизнестээ шинэчлэл хийсний дараа үйлдвэрлэл, борлуулалтын стратегиа өөрчлөхөөр төлөвлөж байгаа ажээ.
Хондагийн төлөөлөгч хэлэхдээ "компанийн хувьд шинэ үйлдвэр барих асуудлыг хэлэлцэж байгаа нь үнэн боловч одоогоор эцсийн шийдвэр гараагүй байна" гэлээ.
Японы автомашин үйлдвэрлэгч компани ирэх хэдэн жилийн дотор хөрөнгө оруулалтын эцсийн шийдвэрээ гаргаж, үйлдвэрийн үйл ажиллагааг 2030 онд эхлүүлэхээр төлөвлөж байна гэж асуудлыг сайн мэдэх ойрын эх сурвалж мэдээлжээ. Ялангуяа өндөр эрэлттэй байгаа гибрид хөдөлгүүртэй спорт загварын автомашинуудыг үйлдвэрлэх талаар судалж байгаа гэнэ.
Гибрид загваруудаа олшруулах нь стратегийн нэг чухал хэсэг хэмээн Хонда үзэж байгаа бөгөөд 2029 оны санхүүгийн жилд эхний ээлжинд Хойд Америкт 15 шинэ загвар гаргахаар төлөвлөж байна.
Эцсийн шийдвэр гаргахад АНУ-Мексик-Канадын хэлэлцээний (USMCA) үйл явц мөн адил нөлөөлнө гэж компанийн төлөөлөгч нэмж хэллээ. Тус компани Канад, Мексикийг хамарсан Хойд Америк дахь нийлүүлэлтийн сүлжээг байгуулсан бөгөөд хэлэлцээний үр дүнгээс хамааран АНУ-д шинэ үйлдвэр байгуулах эсэхээ шийдэх ажээ.
