Ерөнхий сайд Н.Учрал нийслэлийн Засаг дарга бөгөөд Улаанбаатар хотын Захирагчаар Бяруузанын Пүрэвдагвыг батламжилж, хотын даргын тамгыг хүлээлгэн өглөө. Нийслэлийн ИТХ-ын ээлжит бус XII хуралдаанаар нийслэлийн Засаг дарга бөгөөд Улаанбаатар хотын Захирагчаар МАН-ын Удирдах зөвлөлийн гишүүн, Нарийн бичгийн дарга, СДМЗХ-ны ерөнхийлөгч Б.Пүрэвдагвыг нэр дэвшүүлж, олонхын саналаар дэмжлээ. НИТХ-аас нийслэлийн Засаг дарга бөгөөд Улаанбаатар хотын Захирагчаар томилох тухай тогтоолын төслийг баталж, Ерөнхий сайд Н.Учралд уламжилснаар Б.Пүрэвдагва Улаанбаатар хотын 37 дахь дарга боллоо гэсэн мэдээ саяхан л хэвлэлээр явж байв.

Гэтэл одоо Б.Пүрэвдагва хотын даргаар томилогдоод зуу хонох гэж байна. Энэ долоо хоногт болох гэнэ. Таван сарын сүүлээр томилогдсон ч юм байгаа, нийслэлчүүдийн их амралт ч эхэлсэн юм байгаа, наадам, наймдугаар сарын найр гээд цаг хугацаа харвасан сум шиг өнгөрчээ. Аливаа улс, хотын даргаар томилогдсон албан тушаалтанд албаа авсан эхний зуу хоног бол маш чухал хугацаа байдаг. Тийм ч учраас “Засгийн газрын зуу хоног” “Хотын даргын зуу хоног” гэж чухалчилж үздэг. Тэр хугацаанд юу юу хийв, юу хийх гэж төлөвлөв, цаашид яах нь вэ, ямар ажил амжуулж чадах вэ гэдгийг энэ зуу хоногоор шинждэг. Манай хотын залуу даргын хийж бүтээсэн нь юу байна вэ гэж бид түүнээс асуух цаг иржээ.

Хуучин хотын дарга Х.Нямбаатар ажлын хувцастай гудамжинд өнждөг байв. Бас болоогүй хэрүүл хийгээстэй, түүнээ шууд лайвдаастай л байдагсан. Түүний үед яригддаг байсан, бас хүн толгойтой болгон нь эсэргүүцдэг байсан “Туулын хурдны зам” сая дахиж яригдах шиг болсон. “Хорин минутын хот” буюу “Сэлбэ дэд төв” харин явж байгаа харагддаг. Б.Пүрэвдагва дарга нэг их чимээ шуугиангүй л зуу хоночих шиг боллоо.

Гэхдээ нөгөө “хэлэхгүй хийнэ” гэгчээр юм хийж л байгаа байлгүй гэж найдаж байна. Бодвол “зуу хоногоороо” тайлангаа тавих байлгүй гэсэн хүлээлт байгаа. Бид амарч яваад түүний юу хийснийг анзаараагүй байх гэсэн итгэлтэй л байна. Ер нь ч хотын даргыг анзаарахтай мантай сүүлийн гурван сарыг үджээ. Дээр доргүй бензинд оочерлоод, хөдөө гадаагүй явган таваргахаа алдсаар энэ хүрэв. Х.Нямбаатарыг “унагасан” махны үнэ яасан юм бол гэдгээс авахуулаад түүнээс асуух юм их байна.

Ө.НАЦАГ /Өдрийн сонин/