Дэлхийн Эрүүл Мэндийн Байгууллага (ДЭМБ) Өмнөд Африкийн Бүгд Найрамдах Улсад илэрсэн коронавирусийн шинэ хувилбарыг аюултай ангилалд (variant of concern) оруулж, Омикрон (Omicron) гэж нэрлэх шийдвэрийг өчигдөр гаргажээ.

Энэхүү хувилбар нь олон тооны мутацитай байгаа бөгөөд эрт үеийн нотолгоонуудаас харахад дахин халдвар авах эрсдэл их байна гэж ДЭМБ мэдэгдлээ.

Өнгөсөн пүрэв гаригт буюу энэ сарын 24-нд Өмнөд Африкаас анх энэ хувилбарын талаар мэдээлсэн бөгөөд Ботсвана, Бельги, Хонконг, Израильд мөн илрээд байна.

Одоо хэд хэдэн улс Африкийн өмнөд хэсэгт болон түүнээс гарах зорчихыг хориглох, хязгаарлах шийдвэр гаргажээ.

Вирус нь цаг хугацааны явцад өөрчлөгдөх, мутацид орох нь ердийн зүйл биш юм. Аливаа хувилбар нь халдварлах чадвар өндөртэй байх эсвэл хоруу чанар ихтэй байдаг. Мөн вакцины үр нөлөөг өөрчилж болзошгүй зэрэг тохиолдолд санаа зовоосон буюу аюултай ангилалд ангилалд оруулдаг байна.

Их Британийн эрүүл мэндийн дээд албан тушаалтан вакцин нь шинэ хувилбарын эсрэг "бараг" үр дүнгүй байх болно гэж анхааруулжээ.

Харин Оксфордын их сургуулийн бүтцийн биологич, профессор Жеймс Нейсмит "Энэ бол муу мэдээ, гэхдээ сүйрлийн өдөр биш" гэж хэлсэн байна.

Үүний зэрэгцээ, АНУ-ын халдварт өвчний ахлах доктор Энтони Фаучи хэлэхдээ, "Шинэ хувилбарын талаарх тайлангууд нь "улаан туг"-ыг өргөхөд хүргэх ч вакцинууд энэ ноцтой хувилбараас урьдчилан сэргийлэх үр дүнтэй байж магадгүй юм" гэлээ.

Доктор Фаучи мөн CNN-д ярихдаа, "Зохих ёсоор шинжилгээнд хамруулах хүртэл ... энэ нь таныг вирусын эсрэг хамгаалдаг эсрэг биетүүдээс зайлсхийсэн эсэхийг бид мэдэхгүй" гэв.

ДЭМБ-аас аялал жуулчлалын хязгаарлалтыг яаравчлан тогтоож буй улс орнуудад "эрсдэлд суурилсан, шинжлэх ухаанч арга барилыг эрэлхийлэх хэрэгтэй" гэж анхааруулав.

Гэсэн хэдий ч Их Британи, АНУ, Европын Холбоо болон Швейцарь улс Африкийн өмнөд хэсгийн зарим улс руу хийх болон буцах нислэгээ түр зогсоогоод байна.

Европын Комиссын тэргүүн Урсула фон дер Лейен "Европ дахь бид бүгд маш хурдан, шийдэмгий, эв нэгдэлтэй ажиллах нь одоо чухал байна" гэсэн бол Өмнөд Африкийн Эрүүл мэндийн сайд Жо Фаахла "нислэгийн хоригийг үндэслэлгүй. Аялал жуулчлалыг хориглох, ийм арга хэмжээ авахтай холбоотой зарим улс орнуудын хариу үйлдэл нь ДЭМБ-аас удирддаг хэм хэмжээ, стандартад бүрэн нийцэхгүй байна" гэсэн юм.

Түүний үгийг давтаж, Өмнөд Африкийн Анагаах Ухааны Нийгэмлэгийн дарга Анжелике Коетзи BBC-д ярихдаа, "Энэ улсад зорчихыг хориглосон нь хэтэрхий эртэдсэн шийдвэр" гэв.

Баасан гаригт дэлхийн хөрөнгийн зах зээлүүд мөн огцом унасан нь хөрөнгө оруулагчид эдийн засгийн болзошгүй нөлөөллөөс болгоомжилж буйг илтгэж байна.

Б.Бүжлхамаа

www.bbc.com