УИХ-ын гишүүн Б.Пүрэвдорж өндөр насны тэтгэврийн хэмжээг долоо биш таван жилээр бодож олгох тухай хуулийн төсөл өргөн мэдүүлсэн билээ. Ингэснээр шинээр тогтоолгох тэтгэврийн хэмжээ доод тал нь 100 мянган төгрөгөөр илүү байх нөхцөл бүрдэнэ хэмээн онцолж байсан юм.
Тэгвэл өнөөдрийн УИХ-ын нэгдсэн чуулганаар Б.Пүрэвдорж гишүүн дээрх хуулийг батлуулахыг шаардаж жагсаал зохион байгуулах болсноо мэдэгдлээ.
Тэрээр "Сүхбаатарын талбайд арваннэгдүгээр сарын 8-ны өдрийн 12:00 цагаас долоо биш таван жилээр тэтгэврээ тогтоолгох тухай хуулийг батлуулахыг шаардаж жагсаал зохион байгуулна. Тиймээс ард иргэд маань олноороо ирж оролцоорой.
Миний зохион байгуулах гэж буй жагсаал Монголын түүхэнд анх удаа ард иргэдийн төлөө хууль батлуулах гэдгээрээ онцлогтой. Өчигдөр намайг энэхүү жагсаалын талаар үг хэлсний дараа Х.Нямбаатар сайд "Жагсаалын чинь аюулгүй байдлыг хангая" хэмээн ярьсан. Энэ санаачилгад нь баярлалаа. Гэхдээ доромж маягтай буюу цөөхөн хүн оролцох нь хэмээн хандаж байх шиг байсан.
Тус жагсаалд хөдөө орон нутаг гэлтгүй бүгд ирээрэй хэмээн хүсье. Мөн зарим хүн 2018 онд тэтгэврээ тогтоолгосон иргэд яах вэ, долоон жилээр тогтоолгочихсон нь хохирч үлдэж байна гэсэн сэтгэгдэлтэй байсан. Гэвч батлуулах гэж байгаа хуульд өндөр настны тэтгэврийн долоон жилийг таван жил болгох тухай хууль юм. Тиймээс 2018 оноос хойш тэтгэврээ долоон жилээр тогтоолгосон хүний тэтгэврийг буцааж таван жил болгоно. Тэтгэвэрт гарчихсан хүмүүс нэгэнт долоон жилээр бодуулчихсан юм чинь гээд хойш сууж болохгүй. Бүгдээрээ хамт тэмцээрэй” гэлээ.
