Нүүрсний хулгайн хэрэгт шууд болон шууд бусаар холбогдсон 17 хүний нэрийг өчигдөр АТГ-аас зарласан билээ. Уг хэрэгт холбогдсон УИХ-ын гишүүнээр ажиллаж буй таван гишүүн болох Н.Наранбаатар, Ш.Раднаасэд, Б.Баттөмөр, Ц.Анандбазар, Ц.Сэргэлэн нар мэдээлэл хийлээ.

Энэ үеэр УИХ-ын гишүүн Ц.Анандбазар "Өнөөдөр их сайн юм болж байна. Нүүрсний хулгайн асуудал удаан удаан үргэлжлэх байх. Бид нар ард түмэнтэйгээ нэгдэж, нүүрсний жинхэнэ хулгайчийг бүгдийг ил болгоно. Нэрээ цэвэрлэж авна.

Би долоодугаар ангиасаа хойш нүүрс гэж мэдэхгүй. Зарим хүн элэг доог болгож байна. Гэхдээ энэ бол үнэн. Би бурхны шашинтай хүн. Хулгайг жигшиж явдаг. Би гишүүн болсноосоо хойш ард түмний дуу хоолой болж, бүлгийн үйл ажиллагаанд байнга шүүмжлэлтэй хандаж байсан. 

Нүүрсний хулгайг илрүүлж, хулгайлсан мөнгөөр нь ард иргэдийн ипотекийн зээлийг төлүүлэх хуулийн төслийг боловсруулж, өргөн барина. Бид нүүрсний хулгайн хэргийг илрүүлэх бүлэг байгуулна.

УИХ-аас хамгийн цэвэр таван гишүүнийг нэр цохож зарлаж байгаа нь сонгууль дөхсөнтэй холбоотой" гэлээ.