УИХ-ын чуулганы нэгдсэн хуралдаанаар Монгол Улсын Үндсэн хуульд оруулах өөрчлөлтийн төслийг хэлэлцэж баталсан билээ. 

Тус өөрчлөлтөөр, Үндсэн хуулийн 21 дүгээр зүйлийн 1 дэх хэсэгт "УИХ нэг танхимтай, 126 гишүүнтэй байна. УИХ-ын сонгуулийг холимог тогтолцоогоор явуулна. УИХ-ын 78 гишүүнийг олныг төлөөлөх, 48 гишүүнийг хувь тэнцүүлэн төлөөлөх аргаар сонгоно" хэмээн тусгасан юм. 

Тэгвэл өнөөдөр УИХ-ын гишүүн Б.Пүрэвдорж Үндсэн хуульд оруулсан өөрчлөлтийн талаар өөрийн байр сууриа илэрхийллээ. 

Тэрээр "Ер нь бол нийгэм бухимдуу болсон байгаа. Монгол Ардын нам дахиад үнэмлэхүй болбол "цэвэр луйвар" гэж үзэхээр байгаа. Тийм учраас манай намын гишүүдийн хувьд сонгуулийг шударга зохион байгуулах дээр голчилж ажиллаж байгаа. Миний хувьд энэ жилийн улсын төсвийн тодотголд дээр сонгуулийн санал тоолох машиныг шинээр худалдаж авах, программ хангамжийн асуудлыг шийдвэрлэхээр зорьж байна. 

Хоёрдугаарт, манайд сонгуулийн хууль бүрэн гүйцэт ажиллаггүй. Сонгуулийн хуулиа дагуулж хоёр, гурван хууль гарчихаад үлдсэн 18 асуудлыг Сонгуулийн ерөнхий хороо, Улсын бүртгэлийн ерөнхий газрын журмаар шийдвэрлэгдээд байдаг. Гадаад улсад сонгуультай холбоотой бүх зүйл хуульчлагдсан байдаг. Журмаар асуудал шийдэгдэхээр сонгуулийн штабт ажиллаж байгаа хүмүүст ямар ч хариуцлага байдаггүй. Тэр хүмүүс эрх баригчдын дур зоргоор ажилладаг.

Сонгуулийн тухай хуульд өөрчлөлт оруулж, хариуцлагажуулж, эрүүгийн хуулиар хариуцлага хүлээлгэдэг болох хэрэгтэй" гэлээ. 

Мөн тэрээр "Иргэдийн санаа бодлыг оруулаад сайн хүмүүсийг намын жагсаалтад оруулахгүй бол манай нам ялагдана. Өчигдөр хэвлэлд одоо гишүүн байгаа 10 хүнийг намын жагсаалтад оруулсан зураг байна лээ. Миний хувьд би намын жагсаалтад орохгүй, харин жагсаалтыг сайн хэлэлцэж гаргахгүй бол болохгүй. Зөв байлгах ёстой. Муу нэртэй хүмүүс намын жагсаалтад орвол тойрогт дэвшиж байгаа хүмүүс ч хамт унана" гэлээ.