Ерөнхий сайд Л.Оюун-Эрдэнэ Хэнтий аймгийн Батноров суманд Их Эзэн Чингис хааны үнэнч анд, жанжин Боорчийн өлгий нутагт "Андлалын өргөө” цогцолборын ажлыг эхлүүлж, 2018 онд ашиглалтад хүлээлгэн өгсөн билээ. Цогцолбор байгууламжийг улсаас 1.9 тэрбум төгрөг гаргаж барьсан ч өнгөрсөн Наймдугаар сарын 26-ны өдөр олон нийтээс ирэх шүүмжлэлээс улбаалсан асуудлаар нураасан билээ.

Тэгвэл иргэн Я.Мөнхчулууны санаачлагаар хандив цуглуулж дахин “Андлалын хөшөө”-г босгохоор төлөвлөн ажиллаж байна.

Тодруулбал, “Ядамын Мөнхчулуун” сангийн Голомт банкний 3005105624 дансанд хандив төвлөрүүлж байгаа аж.

Хэнтий аймагт шинээр босгох энэхүү хөшөөг “Ухамсар” бүтээлийг туурвисан МУЭ-ийн шагналт, Урлагийн гавьяат зүтгэлтэн уран барималч А.Очирболд урлах аж.

Шинээр босгож буй “Андлалын хөшөө”-г Боржин Суварга ХХК гүйцэтгэж байгаа аж. Тус компанийн Инженер Ц.Тэнгэртэй, М.Зоригт Есдүгээр сарын 30-нд ярилцсан байна.

Дашрамд, өмнөх бүтээн байгуулалтын зураг төслийг Монгол Улсын Соёлын гавьяат зүтгэлтэн, зураач, дизайнер Д.Эрдэмбилэг агсан хийсэн бөгөөд түүний гэр бүлийнх нь зүгээс барилгыг нураах хүсэлт гаргасан хэмээж байв. Учир нь бүтээн байгуулалтын гүйцэтгэл эх зураг шигээ биш, зураг төслийн хэмжээнд хүрэхгүй гэж үзсэнтэй холбоотой.

Мөн барилгын гүйцэтгэгчээр ажилласан “Хос Санаа” ХХК улсыг хохиролгүй болгож нэг өдрийн дотор 1,9 тэрбум төргөгийг төсөвт буцааж байв.