Хятал улс руу нүүрсний тээвэр хийдэг жолооч нар Сүхбаатарын талбайд мэдээлэл хийлээ. 

Жолооч нарын зүгээс Чойрын чиглэлийн замаар хүнд даацын машины тээвэр хийлгэхийг хориглох тухай ЗТХ-ийн сайд Л.Халтарын гаргасан тушаалыг эсэргүүцэж буйгаа илэрхийлж байна.

Нүүрс тээврийн жолооч нарын тэмцэл өчигдөр эхэлсэн бөгөөд ЗТХЯ-ны гадаа жагсаал хийж, Л.Халтар сайдыг гаргасан тушаалаа цуцлахыг шаардсан боловч хариу өгөөгүй учир өнөөдөр Ерөнхий сайд Л.Оюун-Эрдэнэд хандлаа.

Зам, тээврийн хөгжлийн сайд Л.Халтар тээвэрчдийн холбоотой хийсэн гэрээгээ зөрчиж, Тавантолгойгоос Чойр чиглэлийн улсын чанартай авто замыг хатуу хучилттай зам тавих хүртэл тээвэр хийлгэхгүй гэсэн 158 дугаартай тушаал Аравдугаар сарын 6-ны өдөр гаргажээ. Энэ чиглэлд Хятадын компаниар зам тавиулж, Хятадын талд давуу тал олгох гэж байна.

Монголын тээвэрчид банкны зээлээр, байгаа хөрөнгөө барьцаалж задгай тэвштэй тээврийн машин авсан ч тээвэрлэлт хийж чадахгүй 2-3 сараар цалин орлогогүй зогсож байна.

Гашуун сухайт, Шивээхүрэн, Цагаан хад боомтод олон мянган жолооч нар тээвэр хийдэг бөгөөд хилээр гарах гэж олон сараар дугаарлан хүлээдэг. Авлига хээл хахууль газар авсан, хэн сайн авлигадсан нь сард хэд хэдэн удаа хилээр гардаг гэх мэт хууль зөрчсөн үйлдлүүдийг дэлгэв. Мөн Хятад руу гарах жолооч нараас PCR шинжилгээ авдаг. Хариу эерэг гарсан шалтгаанаар олон жолоочийг буцаасан ч тэд нь Улаанбаатарт ирээд ХӨСҮТ-д шинжлүүлэхэд хариу сөрөг гарсан баримт олон байгааг Монголын тээвэрчдийн холбооноос мэдээлээд Монгол Улсын эдийн засгийн томоохон дамжлага урд хилийн боомтод үүсээд буй гацаа, хүндрэлийг шийдвэрлэхэд анхаарал хандуулахыг Ерөнхий сайдаас хүсэж, шаардлага хүргүүллээ.