Өнгөрсөн пүрэв гаригт ОХУ-ын Кемерово мужийн Листвяжная нүүрсний уурхайд метан хий дэлбэрсний улмаас 50 гаруй хүн амиа алдсан харамсалтай хэрэг гарсан билээ.
Осол гарахаас өмнө тус уурхайн гүнд 285 хүн ажиллаж байсан бөгөөд метан хий дэлбэрснээс гал гарч, уурхай хорт утаагаар дүүрсэн байжээ. Улмаар уурхайн цооног хорт утаагаар дүүрсэн тул аврах ажиллагааг зогсоохоос өөр аргагүй байдалд хүрчээ.
Уг нөхцөл байдалтай холбогдуулан Монгол улсын Ерөнхийлөгч У.Хүрэлсүх Оросын Холбооны Улсын Ерөнхийлөгч Владимр Путинд эмгэнэл илэрхийлж, цахилгаан утас илгээсэн байна.
Тус эмгэнэлд “Оросын Холбооны Улсын Кемерово мужид болсон уурхайн ослын улмаас уурхайчин, онцгой байдлын аврагч зэрэг олон хүний эрдэнэт амь эрстсэнд гүнээ харамсаж байна. Монголын ард түмний нэрийн өмнөөс болон хувиасаа Танд болон Оросын ард иргэд, амь насаа алдсан хүмүүсийн гэр бүл, төрөл төрөгсөд, найз нөхдөд гүн эмгэнэл илэрхийлье” хэмээжээ.
