БНСУ-ын дунд сургуулийн сурагчид доод ангийнхаа 13 настай Монгол охиныг зодож, хүчээр архи уулган, 6 цаг өрөөнд хорьсон ноцтой хэрэг гарсан билээ.

Өнгөрсөн долдугаар сард гарсан уг хэргийн талаар БНСУ-ын MBC телевиз мэдээлснээр уг хэрэг нийтэд ил болсон. Тэгвэл 13 настай Монгол охин болон түүний ээжээс БНСУ-ын холбогдох албаныхан уучлалт хүссэн байна. 

Энэ талаар Гадаад харилцааны сайд Б.Батцэцэг "13 настай Монгол охины тухайд Солонгос улсын албаны хүмүүс уучлал гуйсан, анхаарал хандуулж шийднэ гэдгээ илэрхийлсэн. Салбарын сайдын хувьд гадаадад амьдарч буй иргэдээ асуудал тулгарсан цагт зайлшгүй Элчин сайддаа хандаж байхыг сануулмаар байна" гэлээ. 

Мөн буруутай этгээдүүдийн нүүр царайг нь ил болгож, хуулийн хариуцлага хүлээлгэхийг шаардаж БНСУ-ын Ерөнхийлөгчид хандан гомдол гаргадаг цахим хаягт санал цуглуулах үйл явц одоо ч үргэлжилж байгаа бөгөөд 212 мянга гаруй иргэний санал авсан байна. Гэхдээ 30 хоногийн дараа уг асуудал шийдэгдэнэ. Өөрөөр хэлбэл, нэг сарын эхээр Солонгосын талаас хэрхэн шийдэх талаараа мэдээлэл ирүүлэх юм байна. Мөн Гадаад Харилцааны яам энэ тал дээр анхаарч ажиллаж байгаа гэдгээ мэдээлэв. 

Өргөдөлд саналаа өгөх хугацаа 2022 оны нэгдүгээр сарын 1-нд дуусах юм. 

Уг хэргийг үйлдсэн дөрвөн охины хоёр нь насанд хүрээгүй гэх шалтгаанаар хэргээс мултарсан бол 15,16 настай хүүхдүүдэд нь хариуцлага тооцохоор яригдаж байгаа аж.