Төрийн үйлчилгээний нэгдсэн систем "e-Mongolia"-гийн фэйсбүүк хуудас хакердуулсан асуудал өнгөрсөн амралтын өдрүүдэд өрнөсөн.

Харилцаа холбоо, мэдээлэл технологийн газрыг "яам" болтол нь томруулсан Б.Болор-Эрдэнийг чадваргүй хэмээн иргэд бухимдаж байна. Хэдхэн сарын өмнө Монгол улсын 2.3 сая иргэдийн мэдээлэл цахим хар зах дээр зарагдаж байсан. Энэ асуудал тэгэс гээд дарагдсан. 

Харин Цахим хөгжлийн яамнаас "e-Mongolia"-гийн фэйсбүүк хуудас алдагдсан талаар "Энэ халдлага нь суурь болон үндсэн системүүд рүү чиглэсэн халдлага биш зөвхөн Фeйсбүүк хуудасны админы түвшний халдлага юм. Иймд "e-Mongolia" системийн чат, и-мэйл, төрийн үйлчилгээний бусад платформууд халдлагад өртөөгүй хэвийн ажиллаж байна" гэсэн мэдээлэл өгсөн.

Мэдээж энэ асуудал зүгээр нэг "мэдэгдэл" гаргаад өнгөрөх зүйл биш. Гэтэл Цахим хөгжлийн яамны ТНБД-ын албан үүргийг түр орлон гүйцэтгэгч Б.Болор-Эрдэнэ буюу Обуна дахин асуудалд ороод байна. 

Тодруулбал, "e-Mongolia" системийн аюулгүй байдлыг хангуулахын тулд MNCERT/CC төрийн бус байгууллагатай хамтран ажиллаж сар бүр 5-10 сая төгрөгөөр аудит хийлгэдэг хэмээн худал мэдээлэл өгчээ. 

Энэ талаар “Цахим Аюулгүй Байдлын Мэдээлэл Удирдлагын Төв” (MNCERT/CC) ТББ-аас мэдэгдэл гаргасан байна. 

“Цахим Аюулгүй Байдлын Мэдээлэл Удирдлагын Төв” (MNCERT/CC) ТББ нь цахим аюулгүй байдлын мэргэжилтнүүд сайн дурын үндсэн дээр эвлэлдэн нэгдсэн ашгийн бус байгууллага бөгөөд Монгол Улс дахь цахим аюулгүй байдлын чадавхыг сайжруулах зорилготойгоор ажиллаж ирсэн.

2021 оны 12 сарын 10-ны өдөр, тухайн үеийн Харилцаа холбоо, мэдээллийн технологийн газрын дарга Б.Болор-Эрдэнэ zarig.mn /https://zarig.mn/uhf/ сайтад өгсөн ярилцлагадаа "e-Mongolia" системийн аюулгүй байдлыг хангуулахын тулд MNCERT/CC төрийн бус байгууллагатай хамтран ажиллаж сар бүр 5-10 сая төгрөгөөр аудит хийлгэдэг хэмээн худал мэдээлэл өгсөн байна.

MNCERT/CC нь гишүүдийнхээ гишүүнчлэлийн төлбөрөөр санхүүждэг бөгөөд байгуулагдсан цагаасаа төрийн ямар нэг байгууллагаас санхүүжиж, төлбөр авч үйл ажиллагаа явуулж байгаагүй гэдгээ үүгээр хариуцлагатайгаар мэдэгдэж байна. Ялангуяа e-Mongolia системтэй холбоотой аливаа үйл ажиллагаанд огт оролцож байгаагүй бөгөөд энэхүү системийн аюулгүй байдалд ямар ч хариуцлага хүлээхгүй болохыг мэдэгдэж байна.

Иймд Цахим хөгжил, харилцаа холбооны яамны Төрийн нарийн бичгийн даргын албан үүргийг түр орлон гүйцэтгэгч Б.Болор-Эрдэнэ таныг дээрх хариуцлагагүй мэдэгдлээ яаралтай залруулж, уучлалт гуйхыг шаардаж байна.

“ЦАХИМ АЮУЛГҮЙ БАЙДЛЫН МЭДЭЭЛЭЛ УДИРДЛАГЫН ТӨВ”

(MNCERT/CC) ТББ