Хотын дарга асан Э.Бат-Үүлд холбогдох хэргийн давж заалдах шатны шүүх хурал өчигдөр болсон. Шүүх бүрэлдэхүүн анхан шатны шүүхийн шийдвэрийг хэрэгсэхгүй болгож, хэргийн нэмэлт мөрдөн байцаалтад буцаасан юм. Ингэхдээ Хотын дарга асан Э.Бат-Үүлд авсан таслан сэргийлэх арга хэмжээг өөрчилж, батлан даалтад гаргасан юм.
Хотын дарга асан Э.Бат-Үүл цагдан хорих 409-р ангиас суллагдах үеэр байр сууриа илэрхийлжээ.
Тэрээр "Шүүх хурал хуулиа барьсан, хуульдаа нийцүүлж шийдвэрлэлээ. Миний байнга яриад байдаг зүйл энэ. Хэрэв асуудал байгаа бол шалгах хэрэгтэй. Гэхдээ шалгахдаа бүгдийг хуулийн дагуу, нийцүүлж шалгах хэрэгтэй. Өнөөдрийн шүүх хурал яг л тийм шийдвэр гаргалаа гэж бодож байна. Давж заалдах шатны шүүх бүрэлдэхүүн мөрдөн шалгах ажиллагаа, анхан шатны шүүх хууль зөрчсөн байна гэдэг зүйлийг л ярилаа. Хотын дарга ч байсан бай, жирийн иргэн ч байсан бай хуулийн өмнө тэгш эрхтэй. Гэхдээ ямар нэгэн захиалгагүй, ямар нэгэн хууль зөрчихгүйгээр л үйл ажиллагаа явах ёстой. Энэ бол хуулийн ардчилалын том ялалт. Учир нь, бүгд тэгш эрхтэй. Асуудал байвал бүгд л шалгуулах ёстой" гэв.
