МАН-ын бүлгийн хуралдаан өнөөдөр боллоо. 

Хуралдааны үеэр сэтгүүлчид "УИХ-ын гишүүд хэмнэлтийн бодлогыг хэрхэн хэрэгжүүлэх болон тусгай хангамжаасаа салж чадах уу" эсэх асуудлаар тодруулжээ.

Дээрх асуултад УИХ-ын гишүүн Ж.Сүхбаатар дараах байр суурийг илэрхийлэв.

Тэрээр "Нэгт, УИХ-ын гишүүд дөрвөн тэрбумыг төсөвтэй, түүнийг авдаг гэж хүмүүс буруу ойлгодог. Хэзээ ч тийм зүйл байгаагүй, өмнө нь ч байгаагүй. Тэр бол аймаг, дүүрэгт хийх хөрөнгө оруулж буй эрхтэй холбоотой асуудал юм.

Хоёрт, гишүүд хууль санаачлахдаа 20 сая төгрөг авдаг гэдэг. Энэ нь мөн л ташаа мэдээлэл. Өмнө нь ч, одоо ч тийм зүйл байхгүй. УИХ-ын гишүүдийн жилийн зардал дотор 20 сая төгрөгт хууль санаачлах, мэдээлэл сурталчилгааны зардал гэж олон жил буюу монголын төр анх байгуулагдсан цагаасаа хойш хууль боловсруулах зардал байна гэж хэлчихээд өнөөдрийг хүртэл 0 төгрөг явж ирсэн.

Гадаадын зээл тусламж, төслөөр санхүүжүүлж явсныг нь сүүлийн 10 гаруй жилүүдэд хэдэн төгрөг тавьж байгааг хэлээд байгаа юм. 

Гуравт, гишүүд утасны төлбөрөө төлүүлдэггүй. Шатахууны төлбөр гэдэгт сарын хугацаанд 500 мянган төгрөг байдаг. Гишүүд нэг зөвлөхтэй, нэг туслахтай, орон нутагтаа ажиллах хоёр бие төлөөлөгчтэй байдаг. Ер нь УИХ-ын нийт зардал 50 тэрбум төгрөг байдаг. Хоёр сарын өмнө гишүүдийн зардлаас 11 хувийг, байнгын хороодын зардлыг 16 хувийг хэмнэсэн. Орон тооны цомхотгол хийх нь энэ цаг үед тохиромжгүй" гэлээ.