Засгийн газрын өнөөдрийн Монгол-Оросын хамтарсан гуравдугаар сургуулийн захирлын үүргийг түр гүйцэтгэгчийг томилжээ. Өнгөрөгч долоо хоногт ажлаа өгсөн Ж.Соронзонгийн оронд Сангийн сайд асан Б.Болорыг түр томилсон байна.

БШУ-ны дэд сайд Г.Ганбаяр энэ талаар "Энэ сургуулийг 1992 онд байгуулахдаа хоёр улсын Засгийн газрын хамтарсан гэрээнд "Монгол Улс захирлын томилгоотой холбоотой асуудлыг бүрэн шийдвэрлэнэ" гэж тодорхой заасан байдаг. Өнөөдөр энэ гэрээ хүчин төгөлдөр байгаа. Хоёрдугаарт, өнгөрсөн наймдугаар сард ОХУ-ын Гэгээрлийн яамны ажлын хэсэг Монголд ирээд энэ сургууль дээр ажиллахдаа тодорхой асуудлуудыг тавьсан юм билээ. Эцэг эхчүүдээс төлбөр мөнгө авч байгааг ямар хууль дүрмээр зохицуулж байгаа нь тодорхойгүй. Энэ бүх зүйлийг тодруулах шаардлагатай байгаа₮ гэв.

БШУ-ны сайд Л.Энх-Амгалан:

-Ж.Соронзонг ажлаас нь чөлөөлсөн. Тэрбээр Монгол Улсын хууль тогтоомжийг биелүүлэх үүрэгтэй. Гэтэл ямар нэгэн байдлаар хамт олноо өдөөн хатгаж байна. Монгол Улс тусгаар тогтносон улс. Тиймээс Засгийн газрын шийдвэр, салбар хариуцсан сайдын тушаалыг аль ч улсын ЭСЯ эсэргүүцэж мэдэгдэл гаргах ёсгүй. Энэ бол Монгол Улсын  тусгаар тогтнолд халдаж буй хамгийн болчимгүй үйлдэл гэж ойлгож байна.

Удахгүй Монголын Гадаад харилцааны яамнаас энэ асуудалд албан бичиг гаргах байх. Сургуультай холбоотой асуудалд цэг тавьсан. Энэ талаар дахин сөхөх ёсгүй. Боловсрол, шинжлэх ухааны дэд сайд Г.Ганбаяр Орос, Монголын хамтарсан III сургуулийн Удирдах зөвлөлд багтдаг. Цаашдаа энэ асуудлыг дэд сайд хариуцна. Өчигдөр сургуулийн удирдлага, эцэг эхчүүдийн төлөөлөлтэй уулзсан байгаа. Бидний зүгээс сургуулийн үйл ажиллагааг тасралтгүй явуулах зорилготой байгаа.