Өнөөдөр цахим орчинд бага насны хүүхэд нийтийн тээврийн автобусанд суух гэж оролдох үедээ зам хөндлөн гүйж, даллан урдуур нь орж, гэмтсэн бичлэг тарсан. Энэ үед "Хүүхдийн гар хугарч, гэмтэл авсан учраас цагдаагийн байгууллага шалгаад зорчигчийн буруутай үйлдэл гэж үзэн хэргийг хаасан" хэмээн мэдээлсэн билээ.

Тэгвэл үүнтэй холбогдуулан Цагдаагийн ерөнхий газраас дараах тайлбарыг өглөө.

"Энэ оны тавдугаар сарын 5-ны өдөр Чингэлтэй дүүргийн 18 дугаар хороо, Зүрх Уулын замд Блю Скай ХХК-ний автобусны жолооч “М” нь 9 настай явган зорчигчийг автобусны араас гүйж яваад гэмтэхэд ТЦА-ны Мөрдөн шалгах хэлтэс шалгасан. Ингэхдээ Зөрчлийн тухай хуулийн 14.7.51-д зааснаар жолооч хөдөлгөөн эхлэхдээ аюулгүй байдлаа хангаагүй үндэслэлээр 100,000 төгрөгөөр торгож, таван оноо хасаж, хохирогч хүүхдэд 2,600,000 төгрөгийн эмчилгээний зардлыг төлүүлж шийдвэрлэсэн" гэжээ. 

Харин Хотын даргын хэвлэлийн төлөөлөгч Н.Сугар дараах тайлбарыг цахим хуудсаараа дамжуулан өгсөн юм.

Тэрээр "Тус үйл явдал 2022.05.05-ны өдөр болсон. Хүүхдийн гар хугарч, гэмтэл авсан учраас хэргийг эрүүгийн цагдаагийн газар хэргийг шалгасан. Ослын хувьд зорчигчийн буруутай үйлдэл гэж үзэн цагдаагийн байгууллага хэргийг хаасан. Харин Блю Скай ХХК-ний зүгээс жолоочийг цалинг 30 хувиар бууруулж, гурван сарын хугацаанд ажлыг нь хийлгээгүй гэж мэдээлэл ирлээ.

Нийтийн тээврийн газраас автобус компаниудад аюулгүй байдал, техникийн бүрэн бүтэн байдлаа хангаж ажиллахыг үүрэг болгож, тогтмол сургалт зохион байгуулж байгаа" гэв.