ЗХУ-д улс төрийн хэлмэгдүүлэлтэд өртөж, амь насаа алдсан Монгол иргэдийн дурсгалд зориулж тэдний нэрийг сийлсэн гэрэлт самбарыг үндэсний цэцэрлэгт хүрээлэнд босголоо. Энэ арга хэмжээнд улс төрийн намын төлөөлөл, хэлмэгдүүлэгчдийн ар гэрийнхэн, бурхан шашны тэргүүнүүд, эрдэмтэн судлаач, улс төрийн хэлмэгдэгсдийн холбоо ТББ оролцов.
УИХ-ын дэд дарга, Цагаатгах ажлыг удирдан зохион байгуулах Улсын комиссын дарга С.Одонтуяа:
-"Монгол Улсын Ерөнхий сайд асан А.Амар, П.Гэндэн Улсын бага хурлын дарга Д.Догсом, Төр нийгмийн зүтгэлтнүүд, сэхээтэн манлайлагчид, энгийн ард иргэд эх орныхоо төлөө хоёргүй сэтгэлээр зүтгэж явсан ч тухайн цаг үеийнхээ нөлөөгөөр харийн орон руу дуудагдан баривчлагдаж, хилс хэрэгт яллагдан цаазаар авхуулсан юм.
Харь оронд амиа алдсан Монгол иргэдийг эх оронд нь нутаглуулаагүй нөхцөл байдал болоод тэдгээрийн үр хойчид дурсгалыг нь хүндэтгэн өвлүүлэх зорилгоор Улсын комиссын ажлын алба, төрийн болон төрийн бус байгууллагууд хамтран хэлмэгдэгсдийн дурсгалд зориулсан ногоон төглийг Үндэсний цэцэрлэгт хүрээлэнд байгууллаа. Энэхүү ногоон төгөлд 249 хэлмэгдэгчдийн нэрс бий.
Ерөнхий сайд асан А.Амарын ач хүү: Миний өвөг эцэг болох А.Амар Монгол Улсын Ерөнхий сайдаар хоёр удаа сонгогдож байсан бөгөөд улс төрийн хэлмэгдэлтээр баригдаж ЗХУ-ын холбоот улсын эрүүгийн хуулийн 51.2.А-д заасны дагуу буудан хороох ялаар цаазлагдсан нь манай улсад төдийгүй бидний гэр бүлд хүнд гарз тохиосон үе байлаа.
Эх орон, тусгаар тогтнолынхоо төлөө амь насаа зориулсан хэлмэгдэгсдийн дурсгалыг хүндэтгэх зорилгоор дурсгалын самбарыг хэлмэгдэгчдийн ногоон төгөл нэртэйгээр санаачлан зохион байгуулсан УИХ-ын дэд дарга С.Одонтуяа, санхүүжилтийг гаргасан НИТХ-ын тэргүүлэгчид болон цагаатгах ажлыг удирдан зохион байгуулсан багийнхан, дурсгалын самбарын төслийг боловсруулсан урлагийн гавьяат зүтгэлтэн Д.Болд зэрэг хүмүүст талархлаа илэрхийлье.
