Зимбабве улсын Засгийн газар шүүгчиддээ зориулж Их Британиас өндөр үнээр хиймэл үс авах шийдвэр гаргасан нь олон нийтийн хурцхан шүүмжлэлтэй тулгараад байна. Тус улсын эрх баригчид Лондоны "Stanley Ley Legal Outfitters" компанид адууны хялгасаар хийсэн 64 ширхэг хиймэл үсийг нийт 150,000 орчим доллараар захиалах шийдвэр гаргажээ.
Гэвч мэргэжилтнүүд "Британий колоничлолын үеийн шүүхийн системийн уламжлалыг орчин үеийн Зимбабвед мөрдөх албагүй" гэж үзэж, харин олон нийт болон хэвлэл мэдээллийнхэн "эдийн засгийн хямралтай байгаа улсад ийм дэмий зардал хэрэггүй" хэмээн эсэргүүцэж байна. Зимбабве улсын хүн амын 63 хувь нь ядуурлын түвшинд амьдарч байгаа. 2017 онд тус улсад ган болж, ургац алдсанаас 5.3 сая хүн хоол хүнсний хомсдолд нэрвэгдэж, өлсгөлөнгийн индексээр дэлхийн 119 орноос 108-д жагсжээ.
Тэгээд ч шүүгчид нь хиймэл үс өмсөж, энгийн хүмүүсээс ялгардаг колоничлолын үеийн уламжлалыг Өмнөд Африк, Кени зэрэг олон оронд халаад байгаа. Их Британид хүртэл иргэний болон гэр бүлийн маргааныг шүүж байгаа шүүгч хиймэл үс өмсдөг уламжлалаасаа татгалзсан байна.
The Guardian
