Засгийн газар өнөөдөр ээлжит бусаар хуралдав. Хуралдаанаар Украинд байгаа Монгол Улсын иргэдийг татан авах асуудлыг хэлэлцжээ. Уг асуудлаар Гадаад харилцааны сайд Б.Батцэцэг мэдээлэл хийлээ.
Гадаад харилцааны сайд Б.Батцэцэг:
-"Украинд нийт 68 оюутан энэ жилийн хувьд сурч байгаа. 22 иргэн байнгын аж төрж амьдардаг ба ихэнх нь Украин улсын иргэнтэй гэр бүл болсон иргэд бөгөөд олон улсын байгууллагад ажилладаг хүмүүс. Тэдгээр иргэд ирэх сонирхлоо илэрхийлээгүй.
68 оюутантай нэг сарын өмнөөс Гадаад харилцааны яам холбогдож ажиллаж байгаа. Украин улсад элчин сайдын яам байхгүй. Өргөмжит консул Украин улсын иргэн ажилладаг. Сарын хугацаанд бид бусад улсын адилаар нөхцөл байдал хүндэрч магадгүй тул оюутнуудаа эх орондоо ирэх зөвлөмж өгсөн. Хэрвээ нөхцөл байдал хүндэрвэл ямар арга хэмжээ авах талаарх зөвлөмжүүдийг өгсөн. Өнөөдрийн байдлаар сарын хугацаанд 41 оюутан эх орондоо буцаж ирсэн. 27 оюутан Украинд байна.
Өчигдөр холбоо бариад Гадаад харилцааны яам цахимаар уулзалт хийсэн. Оюутнууд маань янз бүрийн шалтгаанаар эх орондоо эргэж ирэх шийдвэр гаргаж чадахгүй өнөөдрийг хүрлээ. Шалтгаан нь төгсөх курсийн оюутнууд, мөн хэлний бэлтгэлд сууж байгаа оюутнууд байгаа. Оюутнуудтай холбогдоход эх орондоо ирэх хүсэлтээ гаргаж эхэлсэн. ГХЯ сарын өмнөөс эрсдлийн төлөвлөгөө гарган ажиллаж байгаа.
Одоогийн байдлаар олон улсын нислэгүүд цуцлагдсан байдалтай байна. Бид эхний ээлжинд хоёрдугаар сарын 26,27-ны нислэгт 21 суудал захиалчихсан байгаа. Оюутнуудаа зардлыг нь төлөөд авч ирье гэж шийдээд зардал мөнгөний асуудлыг өнөөдрийн Засгийн газрын хуралдаанаар орууллаа. Нисэж болохгүй тохиолдолд газраар ирэх буюу Польшоор дамжуулж авна" гэв.
