ОХУ-аас Монгол Улсад суугаа ЭСЯ-аас өчигдөр 13:00 цагийн үед "Ардчилсан намын гишүүд болон АНУ-ын либерал ноёрхлыг дэмжигчдийн анхааралд!" гэсэн гарчигтай мэдэгдэл гаргаж монгол иргэдийн бухимдлыг ихэд төрүүлээд байна. Тухайн хаяг нь ЭСЯ-ны албан ёсны хаяг мөн бөгөөд эх сурвалж баталсан юм.
Тэгвэл энэ талаар Элчин сайд асан Ц.Сүхбаатар “ОХУ-ын ЭСЯ-наас АН-д хандан гаргасан мэдэгдэл нь олон улсын харилцааны нийтээр хүлээн зөвшөөрсөн хэм хэмжээг бүдүүлгээр зөрчиж, суугаа орныхоо дотоод хэрэгт оролцсон үйлдэл. Гадаад харилцааны сайд Б.Батцэцэг үгээ хэлнэ үү. Зөвшөөрөөд дуугай байгаад байх уу” гэсэн байна.
Мөн тэрээр "Дипломат ёсонд тухайн улсын эрх ашиг ноцтой зөрчигдсөн гэж үзвэл холбогдох улсын элчин сайдыг дуудан уулзаж эсэргүүцлээ илэрхийлдэг арга бий. Summon гэдэг. Заасан газар, хэлсэн цагт нь очих ёстой. Энэ олон улсын практикт байдаг зүйл. Харилцаанд айхтар нөлөөлөхгүй ч том сануулга" гэжээ.
Мөн УИХ-ын гишүүн Б.Энхбаяр "Тусгаар улсад хандаж буй бол эрх чөлөөт ард түмэнд маань биш, засгийн эрх барьж буй бидэнд хандана уу. Төрийг нь давж ард түмэн рүү хандахыг ямар ч дипломат ёс зөвтгөхгүй" хэмээн бичжээ.
ОХУ-аас Монгол Улсад суугаа ЭСЯ-аас гаргасан дипломат ёс зүйд харшлах энэхүү үйлдэлд Ардчилсан нам хариу мэдэгдэл гаргасан билээ.
