ОХУ-ын Элчин сайдын яамнаас АН-ын мэдэгдлийн хариуд Монгол улсын дотоод хэрэгт оролцсон гэдгийг үгүйсгэсэн тайлбар гаргажээ.
ОХУ-аас Монгол Улсад суугаа ЭСЯ-аас өчигдөр 13:00 цагийн үед "Ардчилсан намын гишүүд болон АНУ-ын либерал ноёрхлыг дэмжигчдийн анхааралд!" гэсэн гарчигтай мэдэгдэл гаргаж, албан ёсны фэйсбүүк хуудсандаа нийтэлсэн.
Энэхүү мэдээлэл нь олон нийтийн бухимдлыг төрүүлж, суугаа улсынхаа дотоод асуудалд оролцсон гэх шүүмжлэлд өртсөн юм.
Мөн Ардчилсан намаас мэдэгдэл гаргаж, ОХУ-ын ЭСЯ-нд үйл ажиллагааг нь сануулж, тайлбар хийж, уучлалт гуйхыг шаардсан билээ.
Тус мэдэгдэлд, "Монгол Улс нь 1992 онд ардчилсан шинэ Үндсэн хуулиа баталж, энхийг эрхэмлэсэн, бие даасан гадаад бодлоготой, бүрэн эрхт тусгаар тогтносон улс гэдгээ олон улсад зарлан тунхагласан ардчилсан улс билээ.
Ардчилсан намын мянга мянган гишүүд баруун, төвийн үзэл дээр сайн дураар эвлэлдэн нэгдсэн бөгөөд энэхүү үзэл санаа нь аль нэг улсын ноёрхол биш, хүн төрөлхтний нийтлэг үнэт зүйл болох эрх чөлөөнд суурилсан үзэл санаа билээ.
Иймд АН уг мэдэгдлийг бүхэлд нь Монгол Улсын дотоод хэрэгт бүдүүлгээр оролцсон явдал хэмээн үзэж байна. Өөрсдийн бүдүүлэг үйлдэлдээ АН-ын гишүүдээс уучлал гуйж, тайлбар хийхийг шаардаж байна" гэсэн юм.
Тэгвэл ОХУ-ын Элчин сайдын яамнаас Монгол Улсын дотоод хэрэгт оролцсон, Венийн конвенцыг зөрчсөн гэдгийг үгүйсгэсэн тайлбарыг орос хэл дээр өнөөдөр нийтэлсэн байна.
