Ерөнхийлөгчийн тангараг өргөснийхөө дараа Владимир Путин ОХУ-ын ерөнхий сайдын суудалд өмнөх ерөнхий сайд Дмитрий Медведевийг томилуулах хүсэлтээ төрийн Думд гаргажээ. Одоо 52 настай Медведев өнгөрсөн зургаан жилийн хугацаанд Оросын засгийн газрыг толгойлсон, түүнээс өмнө Ерөнхийлөгчийн албыг дөрвөн жил хашсан юм.

Өчигдөр буюу Даваа гарагт Путиныг тангараг өргөсний дараа засгийн газрын хуучин танхим ажлаа өгчээ. Засгийн газар огцорсноос хойш хоёр долоо хоногийн дотор Ерөнхийлөгч шинэ ерөнхий сайдын нэрийг дэвшүүлэх ёстой. Харин парламентын доод танхим Ерөнхий сайдад нэр дэвшигчийг долоо хоногийн дотор батлах хуультай.

Шинэ ерөнхий сайдыг төрийн Дум өнөөдөр хэлэлцэнэ. Шинээр томилогдсон Ерөнхий сайд засгийн газрын бүрэлдэхүүнээ долоо хоногийн дотор Ерөнхийлөгчид танилцуулах үүрэгтэй аж. Хэвлэлүүдийн мэдээлснээр Сангийн сайдын үүрэг гүйцэтгэгч Силуанов Макро эдийн засаг, санхүүгийн асуудал хариуцсан нэгдүгээр шадар сайдын албан тушаалд нэр дэвшээд байна. Батлан хамгаалахын асуудал хариуцсан шадар сайдаар одоогийн Батлан хамгаалах сайдын орлогч Юрий Борисов нэр дэвшжээ.

Харин шадар сайдын албан тушаалыг хөдөө, аж ахуйн сайд асан, Воронеж мужийн амбан захирагч асан Алексей Гордеев нэр дэвшив. Мөн тээвэр, холбоо, цахим эдийн засгийн асуудлыг Максимов Акимов өөр дээрээ авах бололтой. Түүний нэрийг Дмитрий Медведев дэвшүүлжээ. Максимов Акимов нь өмнө нь Засгийн газрын хэрэг эрхлэх газрын даргын нэгдүгээр орлогчийн албан тушаалыг хашиж байжээ. Засгийн газарт шинээр томилогдох шадар сайдуудын дунд Константин Чуйченкогийн нэр яригдаж эхлэв. Тэр өмнө нь Путины туслахаар ажиллаж байсан бөгөөд Кремлийн хяналтын хэлтсийг ахалж байжээ.