Эхнэрээ эмчлүүлэхээр БНСУ руу яваад, тэндээсээ АНУ руу явсан Ерөнхий сайд асан Ч.Сайханбилэг эрүүл мэндийн асуудлаас гадна хуулийн байгууллагад шалгагдаж буй асуудлаа ч бас давхар амжуулж яваа бололтой. Ерөнхий сайд асан олон улсад нэр хүндтэй хуулийн фирм болох Amsterdam & Partners LLP-ээр өмгөөлүүлэхээр хөлсөлсөн тухай тус компанийн вэб сайтад мэдээлжээ.

Ч.Сайханбилэг нь 2014-2016 онд Монгол Улсын ерөнхий сайдаар ажиллахдаа Оюутолгойн ордын хоёр дахь шатны хөрөнгө оруулалтын буюу далд уурхайн санхүүжилтын гэрээнд гарын үсэг зурсан билээ. "Дубайн" гэж нэлэгдсэн уг гэрээг байгуулахдаа албан тушаал, эрх мэдлээ урвуулан ашигласан хэрэг тулгаад жил найман сарын хугацаа өнгөрч байна. Харин Ерөнхий сайд асан өөрт нь тулгасан хэргүүдийг улс төрийн зорилготой явуулга гэж үзэж байгаа.

Энэ тухай Amsterdam & Partners LLP фирмийн үүсгэн байгуулагч Роберт Амстердам “Шүүхийн хараат бус байдал, хуульт ёсонд Монгол улсын одоогийн засгийн газар халдаж байна. Ерөнхий сайд асан Сайханбилэг энэхүү уул уурхайн гэрээг байгуулахдаа ил тод, парламентаас олгосон эрхийн дагуу ажилласан гэж бид үзэж байна” хэмээн мэдэгджээ.

Ч.Сайханбилэгийг Монголд хууль бусаар баривчлагдаж, саатуулагдсаныхаа дараа АНУ-д амьдарч байгаа, Х.Баттулгыг 2017 онд Монгол Улсын ерөнхийлөгчөөр  сонгогдсоноос хойш Ардчилсан Намын хэд хэдэн улстөрч, шүүхийн хараат бус байдал, хэвлэлийн эрх чөлөө улс төрийн дарамт шахалтад өртөх болсон талаар тус сайт мэдээлсэн байна.

Эх сурвалж: amsterdamandpartners.com