АН-ын даргын сонгуулийн санал хураалтын явцын талаар хоёр талаас ээлж дараалан мэдээлэл хийж эхэллээ

АН-ын Дотоод сонгуулийн хорооны дарга асан И.Мөнхжаргал 14 цагт мэдээлэл хийж, “Өдрийн 12 цагийн байдлаар намын гишүүдийн 30 хувь нь саналаа өгсөн. Өчигдөр буюу 27-ны өдөр Архангай, Баянхонгор, Булган, Дархан-Уул, Дорноговь, Завхан, Орхон, Хэнтий, Өвөрхангай, Увс, Төв, Хөвсгөл зэрэг аймгуудад урьдчилсан санал хураалт явуулсан байна. Гишүүдийн ирцийн дундаж 50 хувьтай, Увс аймаг хамгийн өндөр буюу 76 хувь, Булган аймаг 72 хувьтай оролцсон" гэжээ.

Харин Дотоод сонгуулийн хорооны дарга Х.Алтанхуяг тус намаас зохион байгуулж буй цахим сонгуулийн талаар "Гишүүдийн ирц сайн байна, Ирцийн мэдээ болон сонгуулийн урьдчилсан дүнг орой 18.00 цагаас танилцуулна" гэв.

АН-ын 140 мянга гаруй гишүүд мессежээр санал өгөх тусгай эрх бүхий код очих бөгөөд өчигдрөөс эхлэн гишүүдийн гар утас руу үүрэн телефоны дөрвөн оператораар дамжуулан илгээж эхэлсэн байна. Оператор компани тус бүр цагт 15 мянган хүний санал авах хүчин чадалтай бөгөөд оройн 22.00 цагаас өмнө бүх гишүүдийнхээ саналыг авч дуусах юм байна.