Үндсэн хуулийн Цэцийн дунд суудлын хуралдаан өндөрлөлөө.
Цэцийн дунд суудлын хуралдаанаар Ерөнхийлөгчийн сонгуулийн тухай хуулийн зарим заалт нь Үндсэн хуулийг зөрчсөн гэсэн дүгнэлт гаргажээ. Уг хуульд Ерөнхийлөгчөөр ажиллаж байсан болон одоо Ерөнхийлөгчөөр ажиллаж байгаа хүмүүс Ерөнхийлөгчид дахин нэр дэвшихгүй байх хязгаарлалтыг тусгайлан зааж өгөөгүй нь Үндсэн хууль зөрчсөн гэж үзсэн байна. Ингэснээр одоогийн Ерөнхийлөгч Х.Баттулга Ерөнхийлөгчид дахин нэр дэвших эрхгүй гэдэг дүгнэлтийг Цэцийн дунд суудлын хуралдаанаас гаргажээ.
Дунд суудлын хуралдааны дүгнэлтийг УИХ 15 хоногийн дотор хэлэлцэн хүлээж авах эсэхээ шийднэ. Чуулганы хуралдаанд оролцсон гишүүдийн олонх Цэцийн дүгнэлтийг дэмжиж санал өгвөл уг шийдвэр эцсийнх болно. Хэрэв гишүүдийн олонхи эсрэг санал өгвөл Цэц Их суудлын хуралдаанаараа уг асуудлыг дахин хэлэлцэнэ.
Дунд суудлын хуралдаанд мэдээлэл гаргагч иргэн Т.Доржханд, О.Мөнхсайхан, Д.Үүрцайх, УИХ-ын итгэмжлэгдсэн төлөөлөгч Н.Энхболд нар оролцож мэтгэлцсэн байна.
