Мэтгэлцээнгүй сонгууль давсгүй хоолтой адил гэж хэлдэг. Дэлхийн Ардчилсан орнууд бүгд улстөрийн сонгуулийн өмнө заавал бодлогын мэтгэлцээн явуулдаг уламжлалтай. Энэ нь Ардчилсан орны улстөрийн соёлын нэг юм.
Дэлхий нийтэд тархаад буй цар тахлын нөхцөл байдлын улмаас манай улс Ерөнхийлөгчийн сонгуулийг богино хугацаанд явуулж, халдвар хамгааллын дэглэмийг баримталж уулзалт хийж буй.
Мөн иргэдийн зүгээс Монгол улсын 2021 оны Ерөнхийлөгчийн ээлжит сонгуульд нэр дэвшигчдийг халз мэтгэлцэхийг шаардаж байгаагаа ч илэрхийлсээр байна.
Ардчилсан намын дарга М.Тулгат Ерөнхийлөгчийн сонгуулийн сурталчилгаа эхлэх өдөр дараах урилгыг гаргаж байв. Тодруулбал, Цар тахлын онцгой нөхцөл байдалд богино хугацаанд Ерөнхийлөгчийн сонгууль явагдах учраас нэр дэвшигчид орон нутгийн уулзалтуудаа хамтарсан байдлаар хийж, хэвлэл мэдээллийн хэрэгслээр бодлогын мэтгэлцээнийг таван удаа явуулж, ард түмэнд хүртээмжтэй байдлаар мэдээллийг өгөх уриалгыг МАН болон Зөв ХҮН электорат эвслээс нэр дэвшигч нарт хүргүүлээд байсан юм.
Тэгвэл, энэхүү уриалгын хариуд Зөв ХҮН электорат эвслээс хариу бичиг ирүүлж Ерөнхийлөгчийн сонгуульд нэр дэвшиж буй гурван нэр дэвшигчийг оролцуулсан таван удаагийн мэтгэлцээн нэвтрүүлэгт оролцоход бэлэн, хамтран ажиллах хүсэлтэй байгаагаа илэрхийлжээ.
Ийнхүү Монгол улсын Ерөнхийлөгчийн сонгуульд АН-аас нэр дэвшигч С.Эрдэнэ, Зөв ХҮН электорат эвслээс нэр дэвшигч Д.Энхбат нар мэтгэлцэхэд бэлэн байна.
Цар тахлын хүрээ хумигдаагүй энэ цаг үед нэр дэвшигчид олон нийтийн радио телевизийн сувгаар шууд мэтгэлцээн нэвтрүүлэгт оролцож, үзэл бодлоо уралдуулах нь иргэд олон нийтэд хүртээмжтэй бодит, тэнцвэртэй мэдээлэл өгөх хамгийн зөв шийдэл юм.
Мөн МҮОНРТ-ийн захирал А.Бүрэнбаатар Ерөнхийлөгчийн сонгуулийн халз мэтгэлцээнийг зохион байгуулах, шууд дамжуулах бэлтгэл ажил хангагдсан хэмээн өөрийн цахим хуудаснаа бичсэн байна.
