"Токио 2020" зуны олимпийн наадамд амжилттай оролцож, медаль хүртсэн тамирчдад олгох шагнал, урамшуулал олгох талаар Биеийн тамир, спортын улсын хорооны дарга Ц.Шаравжамц мэдээлэл хийлээ.
Тэрээр "Монголын баг тамирчид олимпод амжилттай оролцож нэг мөнгө, гурван хүрэл медаль хүртсэн.
Токиогийн олимпын нээлтэд Ерөнхий сайд оролцон, эх орондоо буцаж ирмэгцээ буюу Наймдугаар сарын 4-ний өдрийн Засгийн газрын хуралдаанаар Олимпийн наадмаас медаль авсан тамирчдадаа байр олгох тухай шийдвэрийг гаргасан байгаа.
Мөн мөнгөн медаль хүртсэн тамирчинд нэг удаагийн мөнгөн урамшуулал болох 60 сая төгрөг, түүнээс гадна сар бүрийн урамшуулал гурван сая төгрөгийг 2022 оны нэгдүгээр сараас олгох юм.
Олимпод оролцсон тамирчдын сүүлийн ээлж Наймдугаар сарын 10-нд эх орондоо ирсэн бөгөөд Улсын Онцгой комиссоос тамирчдыг 14 хоног гэртээ байж тусгаарлагдахыг зөвлөсөн. Сүүлийн ээлжид ирсэн тамирчдын тусгаарлалтын хугацаа Наймдугаар сарын 24-нд дуусаж байгаа тул 25-ны өглөө 10:00 цагт Монгол Улсын Ерөнхийлөгч хүлээн авч тамирчдад цолыг нь гардуулна.
Дараагаар нь 12:30 цагт Ерөнхий сайд хүлээн авч, урамшуулал, байрыг олгохоор товлосон байгаа.
Саид Моллай, Ц.Цогтбаатар, Б.Болортуяа нарт гавьяат тамирчин, М.Уранцэцэгт Хөдөлмөрийн баатар цол олгоно" гэлээ.
