Өчигдөр буюу Ням гаригт Өмнөд Солонгосын хууль зүйн яам тус улсад хууль бусаар оршин сууж буй гадаадын иргэдийн тоог улс улсаар нь танилцуулжээ.

Хууль бусаар оршин суугч гадаад иргэдийн асуудлаар Өмнөд Солонгосын парламентын ажлын хэсэг засгийн газарт аудитын шалгалт явуулж байгаа юм. Үүний үр дүнд одоогийн визний бодлогын цоорхойг олж, засварлах зорилготой аж.

Энэ оны наймдугаар сарын байдлаар Өмнөд Солонгост 2.3 сая гадаадын иргэн оршин сууж байгаагийн 14.5 хувь буюу 335,433 хүн визний хугацаагаа хэтрүүлэн хууль бусаар амьдарч байгаа ажээ.

Тэдгээрийн хамгийн олон нь буюу 36 хувь нь (120,000 орчим) Тайландын иргэд байна. Энэ нь Өмнөд Солонгост оршин суугаа нийт 188,206 Тайланд хүний 65 хувь болж байна. Мөн Хятадын иргэд нийт гадаад иргэдийн бараг тал нь болж байгаа ба 70,000 орчим иргэд хууль бусаар суугаа гэнэ.

Монголоос Өмнөд Солонгост нийт 44,272 хүн оршин сууж байгаагийн гуравны нэг орчим нь буюу 15,478 хүн хууль бусаар амьдарч байна.

Казахстаны 30,525 иргэний бас гуравны нэг орчим нь (11,746) визний хугацаа хэтрүүлэн оршин сууж байгаа гэнэ.

Өмнөд Солонгост хууль бусаар амьдарч байгаа иргэдийн ихэнх хувийг Тайланд, Хятад, Монгол, Казахстаны иргэд /65 орчим хувь/ бүрдүүлж байна.