Төрийн ордны зүүн талын хашааг засварлах ажил өнгөрсөн сарын 28-нд эхэлсэн. Засварын ажил эхэлснээс хойш нилээдгүй хэл ам таталж буй. Анх засварын ажлыг эхлүүлэхдээ явган хүний замыг бүтэн хааж барьсан нь "иргэндээ ээлгүй төр" гэж чичлүүлэв. Хоёр хоногийн дараа багахан зай гаргаж, үүгээр явган хүн "явж" болно гэж байв.
Тэгвэл өчигдөр засварын ажил дуусч, гадуур нь татсан хамгаалалтын хашааг буулгажээ. Мөн л хэл ам дагуулав. Шинээр баригдсан хашаа нь цонхтой хана, монгол гэрийн хэлбэр бүхий хаалгатай болсон байна. Гэвч цонхтой хананы өгнө будаг иргэдэд таалагдсангүй.
Тэгвэл уг хашааг яагаад чулуун эмульс ашиглаж гүн ногоон өнгийн будгаар будсан талаар эх сурвалж мэдээлэхдээ, "Төрийн ордны хойд талын хашааны будаг шиг хийсэн. Уг нь гантиг чулуугаар хийх ёстой. Гэхдээ Польш улсын Ерөнхийлөгчийн айлчлалтай холбоотой яаралтай байдлаар эмульс ашиглаж янзалсан. Баруун талынх шиг гантиг чулуугаар хийх талаар шийдвэр удахгүй гарах байх" гэв.
Иймэрхүү байдлаар төрийн ажилд уялдаа холбоо байдаггүй гэдгийг иргэд бид харсаар, төсвийн мөнгө урссаар л байна.
